Set hloh mah se Swiatek a chak

Iga Swiatek chuan Madrid Open khelh laiah a vawi khat nen set a hloh a, mahse world number 1 hian a khingpui Ekaterina Alexandrova chu 6-4, 6-7 (3), 6-3 a hnehin quarterfinal a inhlangkai ta tho.

Swiatek hian semifinal lut tur chuan Petra Martic a hneh leh a ngai dawn. Seeded 27-na Martic hian inkhel dangah seeded 11-na Barbora Krejcikova chu 6-3, 7-6 (1) in a lo hneh ve thung a ni.

Clay court bikah Swiatek hian tournament a hmachhawn hnuhnung pariatah quarterfinal chin tal a thleng ziah, kum 2016 aṭanga 2019 inkar khan Simona Halep chuan hetiang hian vawi 10 a lo ti tawh bawk.

Seeded pathumna, season hmasa lama Madrid Open finalist ni bawk Jessica Pegula pawhin Martina Trevisan chu 6-3, 2-6, 6-3 a hnehin a thiam zual pariat zingah a inhlangkai ve bawk a ni.

Aryna Sabalenka pawhin seeded pahnihna a nihna a lantir, tleirawl duhawm Mirra Andreeva chu 6-3, 6-1 in a hneh. Russian player Andreeva hi kum 18 mi chauh a la ni, tun ṭumah hian qualifier aṭanga invaw tling niin main draw a khelh vawi khatnaah sulhnu a nei ṭha hle.

A match hmasa lamah Andreeva hian season hmasa US Open finalist Leylah Fernandez a lo hneh tawh. WTA 1000 Masters khel hmeichhe zingah last 16 lut thei naupang ber a ni hial a, mahse a zinkawng ngaihnawm hi Sabalenka lakah a tawp.