Zaninah FA Cup semifinal rematch : Brighton & Hove Albion Vs Manchester United

Zanin dar 12:30 hian Brighton & Hove Albion-in Amex Stadium-ah Manchester United an mikhual dawn. April thla tawp khan Wembley Stadium-ah team pahnih hi FA Cup semifinal-ah an inhmachhawn a, penalty shootout hmangin Man United an vannei ta zawk.

Inkhelh banah Roberto De Zerbi chuan, "Penalty-ah hi chuan a chak phu lo zawk an chak ṭhin," tiin chak phu zawk a nih thu a sawi a, an khelh dan thlirin a thusawi dikna pawh a awm. Chutihrualin De Zerbi thusawi avangin zanin Premier League inkhel boruak a sang sawt dawn a, 'a vawtu in ek a cheh loh' nan Seagulls hian hnehna an chan ngei a ṭul dawn a ni.

Brighton an thiam

Brighton hian Man United an hneh loh zawhah Nottingham Forest lakah an tlawm a, amaherawhchu kartawp khan game mawi bik an khel chhuak. Seagulls hian zanina an khelhna tur Amex Stadium-ah Wolves chu 6-0 in an sawp.

Seagulls hi 6-0 in an chak ringawt lo a, passing game khelin tlarhnung aṭangin ball an inpe chhuak a, an goal bawh a na bawk. De Zerbi hote hian tlarhma aṭangin pressure an pe ṭan a, an vanneih ṭum ni se goal ruk aia tam khel thei a ni.

Italian manager De Zerbi chuan, "Manager ka nih hnua kan khelh ṭhat ber," tiin a sawi a, an player pawimawh Alexis Mac Allister, Kaoru Mitoma leh Moises Caicedo te bench-ah a la dah zawk.

Brighton hian Man United lakah hian phuba lak ringawt an tum a ni lo a, season thara Europe inelnaa tel an duh avangin Erik Ten Hag-a hote hi an hneh a ṭul dawn.

De Zerbi Vs Ten Hag

Zanin inkhel tur hi coach inbeihna tiin a sawi theih a, hei hi en châkawmna belhchhahtu a ni. De Zerbi-a'n khelh dan nghet ṭha tak a neih angin Ten Hag pawh hi duh dan bik nei manager a ni a, Italian manager ai hian sulhnu chhuan tur a ngah zawk.

Ten Hag hian hlawhtling takin Ajax a enkawl tawh a, ṭha ber nih duh coach a nih avangin anmahni aia budget hniam club De Zerbi enkawl laka tlawm hi a dik dawn lo.

Dutch manager hian tlarhma tih chak nan Alejandro Garnacho a neih belh dawn a, Aston Villa an hneh ṭumin Harry Maguire chu bench aṭangin a rawn lut leh tawh bawk. Amaherawhchu Lisandro Martinez chu tun season-ah a chhawr thei dawn tawh lo a, Scott McTominay leh Raphael Varane te erawh mamawh dan a zira chhawr theih an ni tawh ang.

Man United hian match 32 aṭangin point 63 a hlawh chhuak a, Brighton-in match 31 aṭangin point 52 an hmu thung. Seagulls tan Champions League khelh a har tawh dawn a, chutihrualin Europe inelna hrim hrim khelh phak erawh thil theih a ni. Chumi tur chuan Man United hneh hi hna pawimawh hmasa a ni.

Man United thar
Tute nge thlak ngai?

Manchester United-in nipui bazar an thlir ṭan a, an player kawlte aṭangin champion thei tura an ngaih lohte chu an paih chhuah loh pawhin a thlakna tur an ngaihtuah a ṭul dawn.

David de Gea: Man United-in Edwin van der Sar thlak nan David de Gea an lalut a, Spainish keeper chungah rinna an nghah. De Gea hian 2012-13 khan Premier League nomawi a chawi a, Man United Players' Player of the Year pawh ṭum li a ni tawh. English club hian hlawh pawh a pe tam a, tunah hian kar khatah £375,000 an hlawhtir hial.

Tun hnaiah De Gea hi fakna aiin sawiselna a ri tam zawk a, amah el thei tura ngaih Dean Henderson leh keeper dangten an tluk bawk si loh avangin number 1 erawh a la ni reng. Tlarhnung aṭanga ball inpekchhuah an uar a, De Gea hi ball pet a thiam tawk loh avangin hemi kawngah hian United an hnufual phah. Hei vang tak hian a chhuah ringtu pawh an ṭhahnem.

De Gea hi an duh tawk tawh lo tih lanna chu tun season tawpa a contract a tawp tawh dawn chungin a hlawh tihniam turin an dawr a, an awh ngawih ngawih a ni tawh lo tih a lang. Chutihrualin De Gea hi an thlak dawn a nih chuan United-in goalkeeper-ah sum an sen hnem a ṭul ang.

Spanish keeper thlak zo thei tura ngaih keeper ho chu pound maktaduai 40 chuang man vek an ni dawn. Valencia keeper Girogi Mamardashvili chu pound maktaduai 45 bawr vela sawi a ni a, Porto keeper Diogo Costa leh Brentford keeper David Raya te pawh an tlawm thei lo. A buaithlak lai chu De Gea aiin an ṭha dawn chiang em tih hriat a ni lo bawk!


Tlarhnung: Man United ṭhatna chu tlarhnung a ni a, chutihrualin captain Harry Maguire a langsar nghal. England international defender hi an dam kim chuan a khel pha lo a ni ber a, rin a hlawh tawh miau loh avangin Maguire leh club tan a chhuah hi a ṭhat ber a rinawm.

United ṭhat tawk lohna chu mual dinglam hi a ni a, nikum kum tawp lama an sawisel Aaron Wan-Bissaka a rawn che ṭha leh ta si hian ngaihtuahna a tibuai ang. Diogo Dalot hi ṭhat hmel tak siin puitlin tawk lohna a nei leh ṭhin. Ten Hag-a'n tlarhnung a thuam chak dawn a nih chuan mual dinglam a nih rinawm a; player lakluh theih nia langte chu Jeremie Frimpong (Bayer Leverkusen), Denzel Dumfries (Inter Milan) leh Vanderson (Monaco) te chu a awh deuh tur an ni.


Midfield: Man United-in Casemiro, Christian Eriksen, Bruno Fernandes, Scott Mc Tominay, Fred leh Donny van de Beek te an nei a, an squad a chhah ṭha ang reng hle. Bayern Munich aṭangin midfielder Marcel Sabitzer an hawh mek bawk. Sabitzer hian Old Trafford-a cham a, Ten Hag-a hnuaia khelh chhunzawm a duh.

Hming en mai chuan United midfield an ṭha viau a, mahse tun season bikah chuan an hmelma Man City an el pha lo. Ten Hag-a'n a duh ber Frenkie de Jong a lalut thei lo tih chu tlang hriat a ni a, mahse Dutch midfielder hian Old Trafford pan aiin Nou Camp-a cham a thlang. Tun nipuiah hian thawnthu ngai bawk hi a rawn ri nawn leh thei a, chutihrual Ten Hag-a hote hian lak awlsam tur zawk Ryan Gravenberch (Bayern Munich) leh Ruben Neves (Wolves) te an melh thei bawk.


Forward: Man United hian mual sir lam aṭanga goal nawrna turin sum an seng tam tawh. Jadon Sancho an lakluh hnuah Antony an lalut leh tawh a, Marcus Rashford bakah rawlthar duhawm Alejandro Garnacho chu contract an pawtsei a, Facundo Pellistri pawh a rintlak chho viau. Sweden international Anthony Elanga hi United first team-a khel turin a ṭha tawk lo a ni thei a, Sunderland-a loan hmanga khel mek Amad Diallo-a'n season ṭha tak a hmang. Ten Hag-a'n a neih sa a chher hriam theih chuan mual sirah sum sen a ṭul lo thei ang.


Out and Out Striker: Man United-in Cristiano Ronaldo hoin bul an ṭan a, Portuguese striker-in season chanve a daih tak loh avangin January thlaah player an lakluh a ngaih phah. English club hian player man tlawm zawk Wout Weghorst an lalut a, Dutch striker hi taima mah se mamawh ber goal a keng tel lo a, tlarhmaah a hlauhawm tawk lo bawk. French forward Anthony Martial chu Weghorst aiin theihna sang zawk ni mah se a inhliam ve reng avangin innghahna tlak a ni lo.

Nipui bazara Man United-in sum an sen tamna ber tura nia lang ta chu out and out striker lei nan a nih a rinawm a, Harry Kane hming a rawn ri nghal. United hian Harry Kane hi an la thei a nih chuan nomawi an beisei ngam a rinawm a, mahse Kane lak hi a awlsam dawn lo.

Striker dang an melh a nih pawhin Jonathan David (Lille), Lautaro Martinez (Inter Milan), Goncalo Ramos (Benfica), Marcus Thuram (Borussia Monchengladbach) leh Dusan Vlahovic (Juventus) te chu hming langsar deuh an ni a, amaherawhchu Kane angin heng striker ho hi chu a huhang a lian lo ang.