Barca an chak; Real an tlawm - champion a hnai ta!

Thawhlehni zan khan Barcelona chuan an mikhual Osasuna chu 1-0 in an hneh a, Catalan club chak thu hre saa inlan Real Madrid chuan an mikhualna ramah Real Sociedad chu 2-0 in an ngam lo thung.

Barca hian Osasuna an inhnehtawkpui mai dawn niin a lang hman a, mahse, minute 85-naah Jordi Alba chuan goal a khung - player 10-a khel Osasuna tan si phurh sut turin hun a tam tawk tawh lo.

Xavi naute an chak a, Real-in an chak loh chuan champion a chiang hnai sawt dawn tih an hai lo. Mahse, Sociedad tan Takefusa Kubo leh Ander Barrenetxea ten goal khat ve ve an khung a, 2-0 in Real an tlawm.

Real-in goal an chhuah hnuah right back Dani Carvajal chu red card vangin an chân a, comeback a harsa tawh - Barca-in point 14-in hma an hruai fal ta a, an league match khelh leh hmasak berah Espanyol an hneh chuan an champion ang.

Barca tan

Osasuna-in Inrinni zanah Copa del Rey final an khel dawn a, an hmachhawn tur hi Real Madrid an ni - La Liga lamah an him chian tho bawk avangin coach Jagoba Arrasate-a'n a tih tur a hre chiang a, an match hnuhnung ber aṭangin player pakua ngawt a thlak danglam.

Hei vang hian Barca tan a harsa dawn lo tih a hriat a, inkhel ṭantir aṭangin game an thunun - minute 26-naa Osasuna centre back Jorge Herrando hnawhchhuah a nih ngat phei kha chuan chak tur a chiang tawh, tiin a sawi theih.

Kum 22 mi Herrando hi Pedri laka a foul avanga hnawhchhuah a ni a, a club tana a match hmasa berah Osasuna youth system chhuak hian red card a hmu. Mahse, professional foul tia sawi theih a ni a, demna tur a awm lo.

Thil mak ve tak erawh Barca hian tam zawka an khel chungin Osasuna lakah goal an khung thei lawk lo a, Copa del Rey khel tur team hi Catalan club lakah an ṭang thei hle.

A tawpah

Barca hian Pedri, Ronald Araujo leh substitute Ousmane Dembele te hmangin chance duhawm nei vek mah se an chhawr thei lo a, Osasuna keeper Aitor Fernandez chet ṭhat zan tak a ni bawk - Frenkie de Jong leh Ansu Fati khung ngei tura lang a dansakte chu a ṭha hle.

Hetihlai hian hmuhnawm reng ṭhin Raphinha chuan freekick hmangin chance duhawm a nei bawk a, mahse, a chhawr thei bik lo. Robert Lewandowski goal khung pawh offside vanga pawm a ni lo a, Nou Camp thawm a reh.

Minute 85-na a her chhuak a, Barca an vanduai reng ta bik lo - Jordi Alba chuan inkhela goal awmchhun a rawn khung a, fans 70,000 chuang pungkhawmte thawm chu ring tak a ni. Osasuna-in chance nei lo erawh an ni bik lo a, mahse, Lucas Torro leh Iker Munoz ten an hun ṭha neih goal-ah an chantir thei lo.

Barca an chak a, Real an tlawm bawk avangin Catalan club-in champion turin league match nga khelh la hmabakah point thum chiah an mamawh ta. May 12 hma chu La Liga an chawl rih ang a, Barca hian May 14 zanah Espanyol an hneh chuan kum 2019 hnua a vawi khat nan an champion ang.

An chesual

Real-in Barca an chak tih an hria a, an champion beiseina chhi nung turin chak an mamawh tih an hre bawk. Mahse, khualmualah Real Sociedad an ngam lo a, Real tan champion beiseina a bo tawh, tiin a sawi theih.

Spanish champion hian thlamuanga Barca dah lo turin chak mamawh mah se, an ṭhat dan berin an khel lo bawk - hliam tenau vangin striker Karim Benzema a inlan thei lo a, midfielder Luka Modric leh centre-back David Alaba te hliam a la dam chiang lo a, hrem vangin winger Vinicius Junior a inlan thei lo bawk.

Real boss Carlo Ancelotti-a'n Inrinnia an khelh tur Copa del Rey final a thlir tel bawk tih a hria a, La Liga-ah beisei la neiah inngai se Benzema leh Modric hi chu chhawr theih mai tura ngaih an ni.

Mahse, Ancelotti-a'n 'risk' a la a, thutlukna a siam sual tih hre turin hun a mamawh rei lo - minute 47-naah Eder Militao chuan Thibaut Courtois ball a pe a, mahse, a pe na hret. Belgian keeper-in a man hmain Takefusa Kubo chuan lo petin, goal ruakah a khung.

Beiseina thamral

Real-in goal khung an mamawh a, an hmuh erawh an duh loh zawk red card a ni - Carvajal chuan minute 61-naah a yellow card pahnihna hmuin hnawhchhuah a ni a, 1-0 a hnufual Real-in player 10-in an khel zui.

Season thara Champions League khelh tum Sociedad an phur sawt a, hun tawp nan minute nga a la awm tihah Barrenetxea chuan chak nemnghehna a rawn khung zui - Real beiseina a thamral a, Sociedad tan Champions League a hnai zel thung.

Sociedad an khel ṭha takzet a, defender Martin Zubimendi-a crossbar tihperte kha uiawm a tling. David Silva chu kum 37 mi ni tawh mah se a la chul lo tih kan hmu nawn. Kubo hming lam hmaih a thiang lo - Japanese forward hian tun season inelna hrang hrangah match 39 khela goal riat khungin assist vawi sarih a nei tawh.

Real tan erawh theihnghilh tlak inkhel a ni a, La Liga nomawi an humhim a rinawm tawh lo. Mahse, nomawi beiseina dang erawh a la awm - May 6 zanah Copa del Rey final an khel dawn a, May 9 zanah Champions League semifinal first leg khel turin Manchester City an mikhual zui ang.