NBA player hlu ber Joel Embiid

Basketball inelna lian NBA 2022-23 season atan Philadelphia 76ers center Joel Embiid chu player hlu ber 'NBA Most Valuable Player' atan thlan a ni a, tun hnai season hnih chhung pahnihna a nih hnuah a chung berah a awm ta.

Embiid hian MVP ni turin Denver Nuggets star Nikola Jokic leh Milwaukee Bucks thiampuipa Giannis Antetokounmpo te an khum, anni pahnih hian tun hnai season li chhung chu MVP chawimawina an lo insem tawh a ni.

Sixers thiampuipa Embiid hian vote thlaktu 100 zinga 73 hnen aṭangin a ṭha ber ni tura vote hmasa ber a hmu a, a pumpuiah point 915 a hmu. Pahnihna Jokic chuan point 674 hmuin point 606 hmutu Antetokounmpo a awm thung.

African player zingah Hakeem Olajuwon (1993-94) hnu lamah Embiid hi NBA MVP ni leh thei hmasa ber a ni a, 76ers player zingah pawh Allen Iverson (2000-01) hnu hetiang dinhmun luah leh thei hmasa a ni hial.

Kum 29 mi Embiid chuan, "Ka chhawr chhuahna leh bul ṭan dan zawng zawng ka chhutlet a, hetiang dinhmun luah tura ka paltlangte ka ngaihtuah chuan lawmna tur hlir a ni, hringnunah chauh ni loin basketball-ah hian chhel taka beih a ngaihzia ka hrefiah," a ti.

Tun season NBA-ah Embiid hian chawhrualin match khatah 33.1 a nei zel phak a, a team hi Eastern Conference semifinal a hruai thleng, an match hnuhnung pahnihah erawh khup hliam vangin a inlan thei lo.

Joel Embiid khelhna Sixers leh Boston Celtics ten tukin dar 5:30 hian Eastern Conference semifinal game 2 an khel leh a ni.