I League-ah hmun ruak a awm; foreign player kiam dawn

Indian football-in hmasawn lam a pan zel a, I League-ah team thar tan hmun a awm dawn a, India rama football thuneitu sang ber All India Football Federation chuan hmun ruak hi a lilam dawn a ni.

AIFF League Committee chuan Tier 1, 2 & 3-ah India ram khawpuite ṭhen hrangin, heng an tarlan khawpui aṭang hian I League-a hmun ruak awm chu pawisain an chhang dawn a, AIFF chuan a thlan hna a thawk leh ang.

Hei chauh a ni lo - I League club-ten ram pawn player paruk an neih ṭhin chu tihkiam a ni a, season thar aṭang chuan I League club-ten foreign player panga aia tam an neih a thiang dawn lo.

AIFF League Committee chu Thawhṭanni khan online-in an inrawnkhawm a, he meeting hi AIFF League Committee chairman Lalnghinglova Hmar chuan kaihruaiin, ruahmanna hrang hrang hi an siam a ni.

Ruahmanna chu

AIFF ruahman dan chuan Tier 1-ah hian New Delhi, Bengaluru, Pune, Gurugram, Chennai, Mumbai, Ahmedabad, Guwahati leh Noida an awm a, tier 2-ah Ranchi, Itanagar, Jalandhar, Ludhiana, Phagwara, Coimbatore, Manjeri, Thiruvananthapuram, Bhopal leh Shillong te dah an ni.

Tier 3 bik atan hian khawpui thlan an awm lo a, Panchayat inrelbawlna hnuaia awm khuaten tier 3 kaltlang hian I League club nei turin an 'bid' ve thei dawn. Mahse, khelmual ṭha leh training-na hmun, airport aṭanga kilometre 200 aia hla loah an neih a ṭul thung.

Ruahman dan chuan tier 1 aṭanga I League club neih tumte chuan vaibelchhe nga aia hniam loin hmun ruak hi an chhan a ngai a, tier 2-ten vaibelchhe 2.5 tal insen an huam a ngai ang a, tier 3 aṭanga dil duh tan a hniam berah vaibelchhe khat tala chhan a ngai bawk.

Mahse, a chhanna tur zat pawisa neih vang ringawtin a la chhan theih loh cheu - tier 1 aṭanga chhangtu chuan a tlem berah vaibelchhe 100 hausakna a neih a ṭul a, tier 2 tan a tlem berah vaibelchhe 50 neih a ṭul a, tier 3 tan vaibelchhe 40 tal neih a ngai bawk.

Hmun ruak

Season tharah I League-ah hian hmun ruak pathum a awm dawn. Season hman zawh tak I League-ah khan team 12-in inelna an hmachhawn a, Mumbai Kenkre leh Sudeva Delhi an relegate a, ruahman anga thil a kal a nih chuan champion team RoundGlass Punjab chuan season tharah Indian Super League an khel dawn bawk.

Second division I League-a a sang pahnih chu season thara I League khel tura tling sa an ni a, AIFF hian lilamna kaltlang hian team pakhat emaw pahnih a belh leh dawn - tun dinhmunah chuan pahnih aia tama belh tumna a awm rih lo a, an duh chuan pakhat chauh an thlang thei bawk a, a la chiang rih lo.

AIFF League Committee hotupa Lalnghinglova Hmar chuan, "Kum 2026-ah chuan I League team 14 tal neih kan tum a, lilamna aṭanga chhanna kan hmuh dan a zirin I League-ah team eng zat nge kan belh ang, tih chu kan ngaihtuah ang.

"Tun hi I League tihlenna remchang a ni a, chutihrual chuan lilamna chhangtute chuan Indian football tana insenso huamin, chutiang tur chuan sum an nei tawk tih kan hriat a ngai bawk," a ti a, club khel tur an thlan fimkhur tur thu a sawi.

Foreign player

League Committee-in thutlukna a siam langsar tak pakhat chu foreign player khel thei zat a tidanglam hi a ni. Season hman zawh tak I League-ah club tinin ram pawn player paruk an neih a thiang a, heng zinga pakhat tal hi Asian player a nih a ngai thung.

Mahse, heng zinga player pali chiah starting XI-ah an tel a rem a, pakhat chu Asian player a nih a ngai. Asian player bik hi foreign player dang hmanga thlak a rem lo a, Asian player vekin a nih loh chuan Indian player-in a thlak zel a ṭul.

Season tharah erawh foreign player panga aṭangin player pathum chiah khelmualah a ruala an awm a rem tawh dawn a, Asian player quota pawh a hranpain a awm tawh dawn lo. Chumi awmzia chu club tan Asian player kawl kher a ṭul tawh lo tihna a ni.

Hei chauh a ni lo - squad player zingah panga tal chu kum 22 (1-1-2002 hnu lama piang) hnuai lam an ni tur a ni tih a ni bawk a, Tetea Hmar kaihhruai Committee hian hmasawnna tura thutlukna hraw tak tak an siam nual.

Hmasawnna

League Committee chairman Lalnghinglova Hmar chuan, "Thil ṭha zawk thlen tumin, rim takin hna kan thawk reng a, tunah hian hmalakna tam tak, kal mek a awm ṭeuh a, season duhawm tak kan khar ṭan mek a ni," a ti.

India rama league langsar Indian Super League leh Hero I League season a tawp tawh a, Hero Super Cup chu khelh zawh a ni tawh bawk. 2nd Division I League chu khelh mek niin, hei pawh a hmawr an bawk hnai tawh.

AIFF hian Indian football hmasawntir tumin theihtawpin hma a la reng a, thla hmasa lawk khan AIFF Executive Committee chuan league hniam lam, khawpui, district emaw state league-ah te foreign player hman phal loh thuchhuah an lo siam tawh.

Indian football-a league sang ber ISL-ah club tinin ram pawn player paruk an nei thei a, mahse, khelmualah pali aia tam a rualin an lut thei lo thung.