Arsenal an la beidawng bik lo!

Premier League champion nih tum Arsenal chuan beiseina an la nei zel, an kuta innghat ni tawh lo mah se an tan chak zel phawt mai chu hna hmasa a ni - Thawhlehni zan khan Chelsea 3-1 in an hneh.

Mikel Arteta naute hian EPL table-ah hma an hruai leh lailawk a, an elpui Manchester City aiin match hnihin an khel tam thung. Nizan khan Citizens an inlan a, he thuziak i chhiar meuh chuan hmahruaitu hi a lo danglam leh thei tawh bawk.

Frank Lampard enkawl Chelsea erawh a zawnin vawi ruk an tlawm ta, tun ang zela an chet chhiat reng chuan Premier League aṭanga tlak thlak hial pawh thil hlauhawm a ni! Blues dinhmun a ṭha lo takzet.

Beiseina

A zawna match thun an inhnehtawk hnuah Manchester City an ngam lo zui a, hun rei tak chhung an awm tawhna Premier League table chung ber aṭanga hnuhthlak an ni. Man City laka an tlawm hnuah Arteta chuan EPL champion an la nih theih thu a sawi.

Spanish manager hian Man City chetsual an chan a ngai tawh tih a hrechiang, mahse beisei a la nei tlat. A beiseina neih hi a player-te rilruah a tuh a, a beisei ang ngeiin thlawpna a dawng ṭha bawk - Emirates Stadium boruak a nung hle.

Chelsea pawhin beisei an nei, chu chu an mangchhia aṭanga harhchhuah a ni. Graham Potter thlaktu Lampard-a'n goal an khung theih dan tur a ngaihtuah nasa, striker Pierre-Emerick Aubameyang chu bul a ṭantir a, forward ṭha Raheem Sterling-a'n a thlawp bawk.

Arsenal lamin City laka mualpho defender Rob Holding aiah Jakub Kiwior an luhtir a, forward Gabriel Martinelli aiah Leandro Trossard chuan bul ṭan ve thung bawkin Thomas Partey aiah Jorginho chuan a club hlui a hmachhawn bawk a ni.

Laipui a puak

An inkhelhna hmun Emirates Stadium a ni a, fans thawm a ṭha. Arsenal lamin inkhel an thunun viau a, minute 18-naah Granit Xhaka-a siamsak chu captain Martin Odegaard-a'n laklawh nei miah loin a khung, ball kal lai a pet hian bar perin goal-ah a lut.

Goal lut hian Chelsea a beng harh thei chuang lo, ball chang tam chu a ngai Arsenal bawk an ni, an goal hnihna pawh a siamsaktu leh a khungtu chu a ngai bawk an la ni - Xhaka siamsak Odegaard-a'n a khung - an match hnuhnung paliah goal li a khung.

Blues hrilhhai a reh hman lo, box sir lama awm Gabriel Jesus chuan buai deuh nuaih karah an goal thumna a khung a, chawlhlawk laia 3-0 a hmahruaitu Arsenal chu an chak dawn tih a chiang der tawh. Second half-a Noni Madueke goal chuan awmzia a nei phak lo.

Arteta nauten goal dang khung belh theihna remchang an nei nual, a bik takin Odegaard-a'n box chhung aṭanga a lo pet dangtu goalkeeper Kepa Arrizabalaga-a'n fak a phu, goal thum chauh an chhuah avangin Blues an lawm ang.

Chelsea an chuai

Todd Boehly leh Behdad Eghbali ten thuneihna an chan hnuah, an thil tih langsar hmasa chu Thomas Tuchel ban kha a ni a, a hnuah chuan bazara an sum hman hnem thu a ni. Bazarah chuan Sakeibaknei angin che mah se, khelmualah chuan Zawhte ang chauh an la ni.

Arsenal khelmuala inlan Chelsea player khan phurna an nei lo a, a tawi zawnga sawi chuan team tana ṭhahnemngai taka khel hmuh tur an awm lo - mimal zahawmna atan tal pawha bei hram hram hmuh tur an awm lo a ni ber.

Gunners captain hlui Pierre-Emerick Aubameyang khan minute 45 hun a hman chhungin ball kha vawi kua chiah a tawk, chung zinga vawi li chu 'thah' (kick-off) aṭangin a la ni zui. Sterling pawhin a thiam a theihnghilh ta emawni tih mai tur a ni.

Lampard-a'n a naute a fuih phur lo tih chu thil chiang a ni a, English manager hian a naute khelh dan tur pawh ruahmanna mumal a nei lo emawni tih mai tur a ni, tun season atan chuan EPL khel chhunzawm tura tlin chu an beisei theih sang ber a ni ang.

---------------

Midang inkhel chungchang leh result chu kan sawi thei lo, kan tih tur erawh kan match khelh apianga chak a ni. Football-ah chuan duh ang renga khelh theih a ni lo, kan chak lo hnua kan thawh leh dan hian min tilawm.

Player leh fans lamin beisei kan la nei tih a taka an lantir thei kha ka lawm, hetiang boruak hi season tluana kan neih chhunzawm ngei pawh ka duhin ka beisei bawk. Tunah chuan Newcastle United khel turin kan inbuatsaih nghal ang.

- Mikel Arteta,
Arsenal Manager

Zep tur a awm lo, goal kan nawr na tawk lo a, team kan ṭangrual tawk lo bawk. Khatiang ai khan kawng engkimah kan kal nat a ngai, mahni inven leh khingpui te beih let kawngah na lehzual zawka kan chet a ngai takzet.

Player ṭhenkhat tan thil a la awlsam lo tih kan hmu bawk. Premier League hi chuan boruak hran a nei, kan naute ṭhenkhat hi chu an insiamrem hun kan nghah a ngai, a pawimawh hmasa atan chuan inrintawkna kan neih a ngai.

- Frank Lampard,
Chelsea Manager