Napoli an champion dawn

Italian football inelna sang berah Napoli chuan kum 33 hnua a vawi khat nan nomawi an chawi leh dawn. Zanin dar 12:15 hian Udinese an lenchilh dawn - Serie A champion ni turin Luciano Spalletti naute tan chak a tawk.

Napoli hian point 18 zetin hma an hruai fal tawh, nizan khan Lazio chuan Sassuolo an hmachhawn. Pahnihna Lazio hian point thum an hmu belh a nih loh chuan, zanina an inlan hma pawhin Naples club hi an champion fel hman dawn tawh tihna a ni.

Kartawp inkhelah khan Napoli hian champion nemngheh theihna remchang an nei a, mahse an hun ṭha an bawhpelh. Spalletti chuan, "Season chawhnu lam a ni tawh a, a tir lam anga hriam reng chu a harsa ve hle.

"A nihna tak sawi chuan thui tak intlansiak ang kan ni a, a hmawr bawkna tur lai hi a harsa ṭhin. Hei erawh kan hriat a ngai, kha leh chen ṭha taka kan khel thei a nih chuan a hmawr pawh kan bawk ṭha thei ang," a ti.

Diego Maradona hunlai khan Napoli hian vawi hnih chu Serie A nomawi an chawi, a hnu lamah an la champion leh lo a, tun hma pawhin an champion ngai chuang lo - hei hian Maradona hnathawh hlutzia a tifiah.

Maradona a thi tawh a, an khelmual hming atan pawh Diego Armando Maradona Stadium tih an vuah tawh. Champion thei dinhmuna an din leh takah chuan Naples mipuiten awmngaihna an hre lo a ni ber.

Khawpui chhunga in hrang hrangah chuan Napoli flag an zar a, club rawng anga in chei rang pawh an tam. Kawtthlerah mipui an pungkhawm a, nomawi lawmna hla an sa hup hup tawh - zanin hian a vawr tawp thlen ngei an tum ang.