Thuawih lo Messi an hrem

Lionel Messi chu Paris Saint Germain phalna tel loin Saudi Arabia-ah a zin a, hei vang hian Paris club chuan an forward hi kar hnih chhung atan an hrem, hetih chhung hian inkhelh leh training a ti thei dawn lo.

Kar tawp Ligue 1 inkhelah Messi telna PSG hian Lorient an ngam lo, he inkhelah hian minute 90 chhung chu Messi hi a inlan. Khawtlang media lamin an tarlan dan chuan Messi hian zin a dil a, mahse an phal lo - amaherawhchu a zin lui tho.

Argentina captain hian Barcelona chhuahsana PSG a zawm khan kum hnih daih contract a ziak, an inremna hi kumin June thla hian a tawp tawh dawn. French infiamna chanchinbu lian L’Equipe tarlan dan chuan an inremna hi an pawtsei dawn lo.

Kum 35 mi Messi hma hun tur an inrinsiak mek. A club hlui leh a chawr chhuahna ni bawk Barcelona lama kir leh chu a duhthusam ber niin a lang, mahse Catalan club tan Messi la kir turin sum leh pai bakah La Liga dan leh hrai chungchangah harsatna a awm.

A kum tam deuh tawh mah se European football inelna sang khelh a la duh a, a tlem berah season khat tan Europe-ah awm a la tum niin an sawi. Saudi Arabia aṭanga sum tam uchuak tak hlawh tura thlemna pawh a la hnar rih a ni.

Copa America 2024 a awm dawn a, chumi hnuah World Cup 2016 thlengin sawi a awm. Heng inelna hi a duh a nih chuan Argentina team lam chuan a khelh dan kawng an ngaithuahsakin a rinawm - Messi chanchin hi nipui bazar ti ngaihnawmtu a ni dawn.