Lakers an chak hmasa phawt

Nimin zing khan NBA Western Conference semifinal game 1 khelh a ni a, champion lai Golden State Warriors chu an mikhual Los Angeles Lakers lakah 117-112 in an chak lo.

Best of seven series hmangin chak zawk zawn tur a ni a, tunah chuan Lakers hian 1-0 in hma an hruai. May 5, Zirtawpni zing dar 6:30-ah Warriors khelmual Chase Center-ah tho game 2 an khel leh ang.

NBA vawi 17 champion tawh Lakers tan Anthony Davis chuan point 30 a neih bakah rebound ṭum 23 a la a, an thiampuipa LeBron James pawhin double-double nei turin (22 points & 11 rebounds) a tlin bawk.

A tirah chuan Warrios lamin bul ṭan fuh zawkin point 10 bawra hmahruai fal lai pawh an nei, mahse quarter hnuhnung ber an khelh meuh chuan Lakers hian point 14 ngawtin hma an hruai fal leh hman.

Stephen Curry leh Klay Thompson te awmna Golden State hian 112-112 in an han nih rual leh hman. Mahse, Lakers tan D'Angelo Russell-a lay-up chu James-a free throw-in a zui a, a hnuah Dennis Schroder chuan basket a neih belh bawk.

Eastern Conference semifinal lamah New York Knicks chuan Miami Heat 111-105 in an hneh a, team pahnih hi series-ah 1-1 in an intluktawk mek. May 6, Inrinni zan dar 1:00-ah game 3 an khel chhunzawm leh ang.