Leipzig-in Freiburg an sawp

DFB Pokal semifinal-ah RB Leipzig chuan player 10-a khel chungin Freiburg chu 5-1 in an sawp. Thawhlehni zan inkhelah hian Leipzig tan Dominik Szoboszlai-a'n goal hnih a khung bakah Dani Olmo, Benjamin Henrichs leh Christopher Nkunku ten goal khat ṭheuh an khung.

Europa-Park Stadion-ah Leipzig an hmuhnawm nghal a, Nkunku-a'n chance ṭha hmasa a hlah. Minute 13-naah Olmo-a'n hmahruaina goal a khung a, minute khat hnuah Henrichs-a'n ṭha zetin a pet goal leh bawk.

Leipzig-in dinhmun an sawhnghet zel a, minute 37-naah Szoboszlai-a'n khung belhin Leipzig-in Freiburg tlarhnung an ṭhiat mawi thei hle.

Nkunku-a'n first half hun pek belhah goal lina a khung a, Freiburg tan thawhchhuah a harsa tawh. Second half-ah Leipzig defender Josko Gvardiol chuan box pawn chiahah Roland Sallai a pawh thluk avangin hnawhchhuah a ni.

Freiburg-in player 10-a khel Michael Gregoritsch hmangin minute 75-naah siphurh sut ṭhen mah se result a tidanglam pha lo. Leipzig-in injury time-ah penalty an hmu a, Szoboszlai-a'n goal-ah a chantir. Nizan khan semifinal hnuhnung zawkah VfB Stuttgart leh Eintrancht Frankfurt te an inkhel a, result kan hre hman lo.