Leeds-in Sam Allardyce an tifel ta

Nimin khan Leeds United chuan Sam Allardyce an lakluh thu an tichiang. Big Sam hian match li a enkawl dawn a, £500,000 a hlawh dawn a, Premier League-a a inhamtanpui theih phei chuan pound maktaduai 2.5 bonus a dawng ang.

English manager Big Sam hian December 2008 khan 19-naa awm Blackburn Rovers enkawlin season tawpah 15-naah a awmpui. October 2015 khan 19-naa awm Sunderland chu enkawlin season tawpah 17-naah a awmpui leh bawk.

December 2016 khan 17-naa awm Crystal Palace a enkawl a, 14-naah season a khar. November 2017 khan 13-naa awm Everton a enkawl leh a, pariatna ni chungin season an khar. Big Sam hi season laihawla rawih a nih ṭumah ṭum li a hlawhtling tawh a, ṭum khat a hlawhchham.

December 2020 khan 19-naa awm West Brom chu a enkawl a, 19-naah bawk season a kharpui. Big Sam hian Javi Gracia a thlak a, match nga chhung chak hmel hmu tawh lo an nih bakah an match hmasa berah Manchester City an hmachhawn dawn avangin hmabak a harsa dawn hle.

Big Sam-a coaching staff-ah Premier League forward zinga hming langsar zinga tel phak ṭhin Robbie Keane pawh a tel dawn a, Leeds United inkhelin ngaihven a hlawh sawt ang.

Tun dinhmunah Leeds hi 17-naah an awm mek a, an chung chiaha awm Leicester City leh an hnuaia chiaha awm Nottingham Forest nen point 30 vek an hmu. Table hnuai lama awm Everton leh Southampton te tan pawh Premier League-a inhamtan hi thil theih a ni a, chutihrualin 15-naa awm West Ham pawhin point 34 chauh an la hmuh avangin an dinhmun a la him bik lo.