A chung berah Man City

Manchester City chuan Nilaini zan khan West Ham United 3-0 in an sawp a, Premier League table chung berah an awm. Etihad Stadium-a inkhelah hian Erling Haaland-a'n goal a khung leh a, Norwegian striker hian tun season-ah goal 35 khung tawhin Premier League season khata goal khung tam ber record a siam.

Kum 22 mi Haaland hian Andy Cole leh Alan Shearer te record a khum a, a record ropui bik avangin inkhelh banah a ṭhianten 'guard of honour' an pe. Man City hian Arsenal aia match khata khel tlem chungin point khatin an hmu tam a, Pep Guardiola hote hi a zawna a vawi thum nan an champion leh a rinawm ta hle.

Goal thum chu

West Ham hi tla thei dinhmuna ding an nih avangin Man City tan inkhel awlsam a ni lo a, David Moyes-a hoten London Stadium-ah goal venhim hna an thawk. Hammers-in goal an venghim ṭha a, an vannei tel bawk.

Riyad Mahrez-a ball pet chu keeper Lukasz Fabianski-a'n a dansak a, Rodri ball pet erawhin goal ban a per thung. Hammers-in Jarrod Bowen hmangin chance nei bawk mah se Ederson tan harsa tur a awm lo a, first half-ah goal a lut lo.

City-in second half-ah Hammers tlarhnung an su hawng ta a, Mahrez-a freekick pet chu Nathan Ake-a'n minute 49-naah a tauh lut. Minute 70-naah Jack Grealish-a through ball chu Haaland-a'n um lutin mawi zetin Fabianski a chip khum.

Player ṭha danglamna a lang a, minute 85-naah Phil Foden-a'n corner kick aṭanga an ball tauh chhuah chu box pawn chiah aṭangin a volley goal. City-in goal thum an khung a, Hammers-in an pet goal ve lo.

Champion a hnai?

Man City-in league match nga khelh tur an la nei a, vawi li an chak chuan an champion dawn. Pep Guardiola hote an dinhmun a ṭha a, an la hmachhawn tur club-te chu Leeds United, Everton, Chelsea, Brighton & Hove Albion leh Brentford te an ni.

Leeds United hi relegate thei dinhmuna ding an ni a, Premier League-a inham tan tumin Sam Allardyce an lalut. City hmachhawn tur Leeds hi Big Sam-a hnuaia an match hmasa ber a nih dawn avangin ngaihven an hlawh ang.

Everton hi relegation zone-a awm mek an ni a, Chelsea erawh Frank Lampard hnuaiah chet lak dan tur an hre lo. A nihna takah chuan Brighton & Hove Albion hi City hmachhawn tura ṭha berah a ngaih theih a, Brentford hi an khirh theih bawk. Chutihrualin Pep-a enkawl City tan point hlohna tur a awmin a lang lo a, point thum hloh ta pawh ni se champion turin an dinhmun a la ṭha tawk tho - Arsenal aia match khata khel tlemin, point khatin an sang mek.

Arsenal erawhin match li chauh khelh tur an nei tawh a, an khingpui tur hi Newcastle United, Brighton, Nottingham Forest leh Wolves te an ni. City aiin Gunners fixtures a hautak zawk a, Mikel Arteta hote tan champion turin thilmak a thlen a ngai tawh ang.

Goal khungtu ropui Haaland

Goal khung thei bik Erling Haaland-a'n goal khung tam club Manchester City a zawm a, a tifuh hle. Norwegian striker hian Premier League-ah goal 35 a khung tawh a, tun season-ah inelna hrang hrangah goal 51 a khung tawh.

Lionel Messi leh Cristiano Ronaldo te vanglaiin season khatah goal 50 an khung fo a, chutihrualin Premier League bikah chuan Haaland hi season khata goal 35 khung thei hmasa ber a ni.

Andy Cole leh Alan Shearer ten season khatah goal 34 an khung tawh a, season khata match 42 awm lai a ni. Season khata match 38 awm hnua goal khung tam ber record chelhtu chu Mohamed Salah a ni a, goal 32 a khung. Haaland hian Salah record hi goal thum laiin a khum tawh a, hei hian City striker goal khung theihzia a pholang.

Haaland chuan, "Zan duhawm bik a ni. Record ka siam hi ka lawm a, point thum kan hlawh chhuak hi ka lawm. Hna ṭha takin kan thawk a, hun rei tak ṭha takin kan khel tawh. Team ṭha tak kan neih avangin ka lawm. Match khelh tur zel atan rilru ka seng ang," tiin a sawi.

Norwegian striker hi a player puite bakah Pep Guardiola leh coaching staff ten guard of honour an pe. Haaland chuan, "Hetiang hi ka la tawng ngai lo a, ka ngai hlu hle," tiin a sawi.

City boss Pep Guardiola chuan, "Kum 22 chauh a la ni a, tun season-ah pawh match nga khelh tur a la awm. Hattrick a siam zawhah minute 60-naah ka thlak fo bawk a, thlak lo ilang chuan hei aia tam hi a khung thei ang. Mahse, inhliam hlauh vangtein kan fimkhur a ṭul si. Player danglam bik a ni a, ka lawmpui e," tiin a sawi.

Guardiola chuan sawi chhunzawmin, "Hlawhtlinna danglam bik a ni a, guard of honour pek kha a phu. Engtik niah emaw chuan ama record bawk hi a la khum ang. Goal hi a la khung zel dawn," tiin a striker hi a chhuang hle.

Haaland hi goal khung thei bik ni mah se RB Salzburg leh Borussia Dortmund tana a khelh laiin season khata goal 50 khung tlin hi a la nei lo a, tun season hi league match bika goal 30 a khung tlin hmasak ber a ni. Hei chauh hi a ni lo, Bundesliga-ah kha chuan Robert Lewandowski a awm avangin vawi khatmah top scorer a ni lo a, tunah season-ah erawh record siam chungin Premier League-a goal khung tam ber a ni dawn.