French Open leh Wimbledon khel lo tur Raducanu

Emma Raducanu chu a ban hliam zai a ni a, hei bakah hian a kerek a hliam bawk - British number 1 hian tun season atan chuan French Open leh Wimbledon a khel thei dawn lo tih a puang.

Kum 20 mi Raducanu hian tun hnai khan a ban an zaina chu social media lamah a pho chhuak a, a inkhelh theih loh tur thu a sawi bawk. US Open 2021 nomawi a lak hnuah hliam leh harsatna hrang hrangin a tlak buak nasa ta hle.

Raducanu chuan, "Hliam vangin tun nipui chhung chu ka inkhel thei dawn lo. A nihna tak sawi chuan tun hnai thla 10 chhung chu hliam vangin ka buai nasa hle, chumi hun harsa kara min thlawp tlattute chungah lawmthu ka sawi," a ti.

A inkhel tam lo a, a inkhelh chhunah a thleng sang thei ta meuh lo bawk. Kar leha world ranking a chhuah thar hunah chuan Raducanu hi a sang zual 100 zingah a tel phak dawn lo, a lo kir leh hunah a tan hna a harsa dawn hle a ni.