Messi-a'n PSG a chhuahsan dawn

Lionel Messi chuan tun season tawp rualin Paris Saint Germain a chhuahsan dawn. Argentina captain hian Paris club tana a contract zo tur chu pawhsei a tum lo - khawi lamah nge a kal dawn tih erawh hriat a la ni lo.

Barcelona chhuahsana PSG a zawm khan kum hnih daih contract a ziak a, a thuphunga an inrem dan chuan season khat atana pawhsei theih tura tih a ni, pawhsei theih tura a tih hi an hmang dawn ta lo tihna a ni.

Nikum kum tawp lam khan hlawh leh contract rei zawng chungchangah chuan Messi leh PSG hi a thuphungin an inrem leh hman, mahse Messi hian European club lian dangte elphak tura Paris club inthuamṭhat tum dan chu a hriat duh a ni.

PSG hian player ṭha sa lei khawm ringawt chu thil tihchiah an ngai rih lo a, an neihsa leh player naupang zawkte chher hriam an tum. Hmalak an tum dan leh Messi ngaihdan a inang lo - April thla khan an inbiakna hi an titawp tawh.

Kum 35 mi Messi hian PSG tana a hun hnuhnung a hmang mek a, club thu pawh a zawm vek thei ta lo. Paris club lamin phalna an pe thei lo chungin Saudi Arabia ramah a zin lui a, hei vang hian chawlhkar hnih chhung atan an hrem mek.

Tunah chuan Messi-a hma lam hun inrinsiak hun a thleng chho mek. Amah leh fans lam chuan Barcelona jersey ha leh thei se tih chu an duhthusam a niin a rinawm, mahse Catalan club tan Argentina captain lakkir hi sum lama an dinhmun nen a theih a rinawm loh.

Club khelhna tur hrim hrim a zawng a nih chuan Messi hian a hmu dawn, mahse European football inelna hmachhawn a la duh nia sawi a ni. Engtik niah emaw chuan Major League Soccer (MLS) club Inter Miami a la zawmin a rinawm.

Sum lama buai lo Saudi Arabia club Al-Hilal chuan sum tam uchuak tak hlawh turin an lo thlem ve bawk. Al-Hilal hian kum khata euro maktaduai 400 hlawhtir an inhuam, hei hi tuna player hlawh hnem ber Cristiano Ronaldo hlawh aiin a let thawkin a tam!

Mahse, tuna a rilru put hmangah chuan Messi hian Saudi Arabia lam a la hawi rih lo. Copa America 2024 khelh chu a hmachhawp lian a ni a, hemi tur chuan football inelna lian leh hautaka intuaihriam reng a la mamawh.

Ngaihtuah ngai erawh European club ṭha zingah tuin nge Messi hi la thei ang tih a ni. An hnena khel tur chuan an duh ngei ang, mahse a hlawh leh thuneihna a ken tel tur zawng zawng nen chuan Messi neitu nih hi thil awlsam a ni ngawt lo - nipui bazar tingaihnawmtu a ni dawn chiang.