Liverpool tan beiseina a la thi lo

Nilaini zan Premier League inkhelah Liverpool chuan 1-0 in Fulham an hneh a, league match nga zet a zawnin an chak ta. Reds ṭantuten season thara Champions League khelh an beisei chhunzawm ve zel a, sawi fo tawh angin, thil mak erawh a thlen tel a ngai dawn.

Liverpool tan Mohamed Salah chuan penalty hmangin inkhela goal awmchhun a khung a, league match nga hnua Reds-in goal an chhuah loh lehna hmasa ber a ni bawk - April 4 khan Chelsea lakah an chhuah lo a, mahse, 0-0 in an inhnehtawk.

Reds-in hnehna an chan avangin table-ah pangana an ni chhunzawm a, palina Manchester United chu point liin an phak lo mek. Mahse, United hian match hnihin an la khel tlem zawk.

Erik Ten Hag-a team hian nizan khan Brighton & Hove Albion an lenchilh a, an result kan hre hman lo - he thuziak i chhiar meuh chuan Liverpool nena an inthlauhna hi a danglam leh tawh mai thei.

Sawi nin theih loh Salah

Anfield-ah goal khung turin Reds-in minute 39 an nghah thlen a ngai a, chu pawh penalty a ni - Issa Diop chuan Darwin Nunez lakah penalty hi a chawi a, harsatna nei loin Salah-a'n goal-ah a chantir.

Tun season-a sawisel tawk nasa tak Salah hian league match 34 aṭangin goal 18 ngawt a khung tawh a, assist vawi sarih a nei bawk. Inelna hrang hrangah match 47 khela goal 29 khungin, assist vawi 11 a nei.

Tun hnaia harhtharna chang Trent Alexander-Arnold a hmuhnawm chhunzawm zel a, English right back hi a vanneih zan ni se, goal khung thei dinhmunah a ding hial.

Liverpool lawmna tizualtu chu Luis Diaz a dam leh ta hi a ni a, Colombian forward hi a che vel a hmuhnawm em avangin fan-ten ding chungin an zahna an lantir hial - a dam ṭhat zel Reds tan a pawimawh.

Lawmna mittui

Liverpool boss Jurgen Klopp chuan, "Goal a chhuah loh avangin Alisson kha a ṭap ṭep hial a ni," tiin fiamthu a thawh a, German coach chuan sawi zawmin, "Tun season-ah kher chuan kan tan thil thleng khat tak a ni a, goal kan chhuah loh kha a bik takin Alisson tan a lawmawm khawp ang," a ti.

Brazilian keeper Alisson hian Carlos Vinicius goal khung ngei tur nia lang chu vawi hnih ngawt ṭha zetin a dansak a, Liverpool player hlui Harry Wilson pawh khel ṭha viau mah se goal a keng tel bik lo.

Jamaica forward Bobby De Cordova-Reid pawhin chance duhawm a nei a, mahse, a hun ṭha neih a chhawr lo - a tawpah chuan Salah penalty chhuih luh chu team pahnih danglamna a ni a, Liverpool-in point thum an hlawh chhuak.

Salah hian penalty aṭang chauh lo pawhin goal khungna chance duhawm a nei a, mahse, Egyptian forward hian a hun ṭha neih a chhawr thei bik lo - a pawimawh ber erawh a team a chakpui a, top four beiseina a la nung ve zel.

A harsa tawh

Liverpool-in hnehna an chan avangin top four a sawi rik loh theih loh a, mahse, coach Jurgen Klopp chuan season thara Champions League khelh chu an tan thil harsa a nih tawh thu a sawi.

German coach chuan, "Top four ni turin beiseina ka neih phah hran lo a, a thleng ve thei e, tih mai chauh a ni. Newcastle United leh Manchester United hian an match zawng zawngah hnehna chang vek se, kan tan chance a awm lo ang.

"Brighton hian hnehna chang vek ta se, kan chungah an awm daih dawn. Chu chu kan dinhmun dik tak a ni - kan hmabak match-ah hnehna chang ila, chuta kan thlen chin tur chu thlir phawt ang," a ti.

Klopp chuan sawi zawmin, "Tun dinhmunah chuan kan kawng zawhah hian ka lawm a, tha thlah loa kan kal zel phawt a ngai - chumi tawpah chuan eng nge kan thlen chin chu kan en ang chu," a ti - Reds hian league match li an la hmabak a, team lian zingah hmachhawn tur an nei tawh lo.