World Muaythai Championship-ah Mizo pathum

IFMA Senior World Championship 2023 hmachhawn turin India chuan team a tir chhuak a, an zingah hian Mizo tlangval Lalngaihawm a tel. Hunthar Veng tlangval hi -48kg huangah a inlan ang.

Thailand khawpui Bangkok-a inelna neih turah hian Mizoten International Referee & Judges pathum kan neih zinga pahnih Liansangpuii Renthlei, Zemabawk North (Mizoram Police) leh Lalhlimpuia, Zonuam (Mizoram Police)-te chu India aiawh-a R&J turin an kal bawk.

Inela hi May 13 thleng awh tur niin, IFMA World Championship-ah hian India rama Muaythai thuneitu sang ber United Muaythai Association India chuan player 12 thlangin chung zingah chuan Mizo player pahnih an tel a, thlan zinga tel Lalruatkima, Falkland erawh engemaw harsatna avangin a kal thei lo a ni.

Muaythai World Championship-ah hian khawvel ram 100 chuang aṭangin infiammi 2,000 vel tel tura beisei an ni a, ring pathumah inelna neih a ni ang a, ni khatah bout 90 vel zel awm tura ruahman a ni.

India Federation president Prasenjit Singha ho in official 8 nen India team chuan nimin khan Kolkata chhuahsanin Bangkok an thleng fel.