Premier League Hall of Fame-ah Ferdinand, Cech leh Adams
Rio Ferdinand, Petr Cech leh Tony Adams te chu Nilaini khan Premier Premier League Hall of Fame-ah lakluh a ni. Kuminah manager ropui pahnih Sir Alex Ferguson leh Arsene Wenger te lakluh an ni a; Manchester United, Chelsea leh Arsenal legend ten an hnung an zui. Hall of Fame-a tel tur hian mipui vote an lak bakah mi 15 telna Premier League Awards panel ten thutlukna an siam.
Defender ṭha mi Ferdinand
Rio Ferdinand hi naupan lai aṭanga talent nei ṭha a ni a, West Ham aṭanga inzir chhuakin Leeds United a pan. Whites aṭangin a hun laia defender manto ber ni turin Manchester United a zawm a, Sir Alex-a hnuaiah hlawhtlinna ṭhahnem tak a chang.
Ferdinand hian Man United tan season 12 khelin season rukah league nomawi a chawipui a, Premier league-ah match 54 khelin goal 11 a khung a, cleansheet ṭum 189 lai a nei bawk. Defence laia Nemanja Vidic nena an inkawp chu Premier League history-a defender laia inkawp rem bera ngaitu pawh an ṭhahnem hle.
Goal veng rinawm Cech
Chelsea-in Roman Abramovich hnuaiah tihfuh an ngah a, an thutlukna ṭha zinga mi chu Rennes aṭanga keeper Petr Cech an lalut hi a ni. Cech hian season khatnaah clean sheet vawi 24 a nei nghal a, Premier League record siamin nomawi a chawipui bawk.
Czech goalkeeper hian Premier League nomawi vawi li a chawi a, league match 443 aṭangin clean sheet vawi 202 a nei pha. Ṭum li ngawt Golden Gloves a dawng a, Arsenal-ah a season tawp lam hmang mah se a ropuina hmun chu Stamford Bridge-ah a ni.
Mr Arsenal 'Adams'
Arsenal chanchin sawi apianga hming dai ngai tawh lo tur Tony Adams hi Gunners hmel lanna a ni a, Premier League Hall of Fame-a lan pawh hi a phu hle. Mr Arsenal ti hiala an sawi Adams hian Premier League nomawi ṭum hnih a chawi.
Gunners captain Adams hi hruaitu ṭha a ni a, tlarhnung innghahna niin league match 255 aṭangin vawi 115 ngawt a cleansheet pui. Adams hian Premier League goal 12 a khung a, chung zinga hlu ber chu Everton lama a khung niin 1997/98 season-a champion nemnghehna goal a ni.