Pep & Klopp te huangah ka awm - Big Sam

Leeds United manager thar Sam Allardyce chuan coach ṭha tak a nih thu sawiin, Manchester City boss Pep Guardiola leh Liverpool manager Jurgen Klopp te nen huang khatah an awm thu a sawi!

Big Sam hming lem an pek coach chuan, "Kum 68 ka ni tawh a, mahse, football thlirna aṭanga thlir chuan kei aia sang bik an awm lo. Pep, Klopp leh Mikel Arteta pawh ni se, ka chunga leng an ni lo," a ti a, hetihlai hian City boss Pep chuan, "Sam-a thusawi hi a dik a ni," tiin a lo chhang ve bawk.

England boss pawh lo ni tawh Big Sam hian May 2021 khan West Brom chu Championship-ah a tlak pui a, Baggies hian chelh duh mah se chhuahsanin, hemi hnu hian club enkawl a nei tawh lo - hei vang hian ringhleltu an la tam.

Big Sam chuan, "Leeds-in min ruai a, mi tam takin uai thla tawh leh ngaihdan hlui tawhah min ngai a, an hresual a ni. Keimahah hian theihna sang tak a la awm reng a, coach ṭhate chuan an tihdan angin an ti a, ka tihdan hi ka kalpui ve mai a ni.

"Football hriatna leh rilna kawngah hi chuan coach ṭha ber berte nen huang khatah kan awm. Pep leh Klopp te ai hian ka ṭha zawk e, ka ti hauh lo a, mahse, anmahni ang tho hian ka ṭha ve tawk a ni," a ti.

Premier League-a an match hnuhnung panga aṭanga point khat chiah hlawh chhuaktu Leeds hian coach Javi Gracia an ban a, league match li khelh tur hmabak la awma enkawl turin Big Sam hi an lalut - Inrinni zan dar 7:30-ah Manchester City an lenchilh ang.

Sam Allardyce chuan, "Inrinniah a harsa berin bul kan ṭan dawn a, khualmuala City hmachhawna bul ṭan aia harsa a awm thei dawn em ni? Chona hautak, kei leh player ten kan hmachhawn ngai a ni a, Manchester City khelmualah result ṭha tak neih tumin kan bei ang," a ti.

Leeds hi Premier League table-ah 17-na an ni mek a, 18-na Nottingham Forest nen an point hmuh zat a inang - City zawhah Newcastle United, West Ham United leh Tottenham Hotspur an hmachhawn zui dawn a, Big Sam-a hna hi a huphurhawm takzet.

Magpies, Crystal Palace leh Everton pawh lo enkawl tawh Big Sam chuan, "Game tlemtê chauh khelh tur a awm tawh a, fixture a hautak em em bawk - hei vang hian ka tan chuan chona hautak ber a ni," a ti a, league-ah Leeds inhamtanpui a tum.

Big Sam hi February-a League One club Oxford United-in coach aṭanga an ban tak Karl Robinson leh Leeds United player hlui Robbie Keane te chuan an pui dawn a, mahse, club hrang hranga a assistant ṭhin Sammy Lee chu UK sorkar dan lam thilah pawh pen a nih rih avangin Big Sam a thawhpui thei dawn lo.

Sam Allardyce chuan, "Lee hian ka bula awm nuam a tih ang chiahin kei pawhin thawhpui nuam ka ti a, kan thawk dun thei lo tur hi pawi ka ti hle a ni," a ti a, a regular assistant tel loin thilmak tih a tum dawn.

Big Sam hian Leeds enkawl manah hian £500,000 (Rs. 5,13,86,200) a hlawh dawn a, Premier League a inhamtanpui chuan pound maktaduai 2.5 bonus a dawng bawk ang.