AC Milan leh AS Roma an him rih lo
Serie A aṭanga season thara Champions League khel tur a chiang thei lo. AC Milan leh AS Roma ten Nilaini zan khan an khingpui an hneh zo lo ve ve a, point hnih an hloh avangin Spezia hneha point thum hmuh belh Atalanta chu panganaah an awm.
Nizan khan hmahruaitu Napoli an inlan a, an chak chuan an champion fel nghal ang. Pahnihna Lazio aṭanga pasarihna Roma thleng hian season thar atana UCL ticket inchuh lai vek an la ni a, champion chiang hma mah se a hnuai lam inel hi a la ngaihnawm dawn.
Nilaini zan inkhel dangah Lazio chuan Felipe Anderson leh Toma Basic te goal hmangin Sassuolo 2-0 in an hneh a, chak lo ni se la chuan Napoli an champion chiang nghal ang. Rei lote chhung atan Naples club an la chelh ve rih hram a ni.
Juve an chak
Beisei phak lo Juventus pawh an chak ve leh ta, tun hnaiah Old Lady hian result ṭha an nei hleithei lo. Mahse, Lecce lakah erawh midfielder Leandro Paredes leh striker Dusan Vlahovic te goal hmangin 2-1 in an chak.
Juve hi match 33 aṭangin point 63 an hmu a, pahnihna Lazio an phak lohna chu point khat chauh a ni. Chutihrualin, pangana Atalanta nen an inkarah point nga chauh a awm a, khelh hmabak match panga an la neih avangin an dinhmun a la him bik lo.
Turin club manager Massimiliano Allegri chuan, "Ka nauten an khel ṭha ka ti hle. A chhan chu Lecce hi engtik lai mahin hmachhawn an awlsam ngai lo, hloh leh tur chuang nei miah loin min bei a ni a, kan tan pawh khan chetsual a hlauhawm hle," a ti.
Juve tan hian midfielder Paul Pogba pawh bench aṭangin a lut ve leh thei tawh. France international midfielder hi hliam vangin a buai ngun em em a, tun season chu a la inkhel mumal hman meuh lo tia sawi theih a ni, a lo kir hi lawmna tur a ni ang.
Milan leh Roma
AC Milan leh AS Roma te hian Champions League leh Europa League khelh tur an la nei, chutihrualin Serie A lama an dinhmun hi an siamṭhat ve reng a ngai bawk - UCL leh Europa lama an hlawhtling a nih loh chuan, season tharah European football khel lo thei dinhmunah an awm.
Tun hnaiah Milan hian goal khung an harsat tlat, an match hnuhnung zawkah pawh hun tawp dawnah goal an khung hram. Cremonese lakah pawh goal an chhuah hmasa, mikhual tam David Okereke chuan minute 77-naah goal a khung.
Milan lamin minute 90+3-ah Junior Messias hmangin an sut hram. Stefano Pioli-a'n Champions League semifinal khelh hmabak an la neih a ngaipawimawh zawk a, chuvangin a player neih ṭhat ber a chhawr lo tih erawh hriat tel a ngai.
Jose Mourinho naute pawh Monza nen 1-1 in an inhnehtawk. Stephan El Shaarawy goal chu Luca Caldirola-a'n Monza tan a sut a, goal dang lut zui loin point khatah an lungawi a ṭum, pasarihnaah an awm a ngaih phah thung.
Goal a sur
An elpui club dang ten goal khung an harsat laiin Inter Milan erawhin Hellas Verona chu 6-0 tehmeuhin an sawp thung. Lautaro Martinez leh Edin Dzeko ten goal hnih ve ve an khung a, Hakan Calhanoglu-a'n a khung bakah Adolfo Gaich chuan anmahni lamah a ti lut bawk.
Inter hi goal an khung theih loh vanga buai ṭhin kha an ni, tun hnaiah erawh Martinez leh Dzeko ten ngai an awh leh ta hi an tan chanchin lawmawm a ni ang, bench lamah Romelu Lukaku an la dahṭha thei zui.
Simone Inzaghi chuan, "Kan duh ang takin kan khel thei, tuna kan dinhmun aia hniamah kan awm loh ka beisei. Palina chuna season zo turin theihna kan nei," tiin a naute lakah beisei a nei sang a, chutihrualin hahchawlhna hun an nei lo tih a sawi bawk.
Inrinni zanah Inter hian Roma an hmachhawn leh nghal dawn a, chumi hnuah AC Milan nen Champions League semifinal first leg an khel dawn. Match khelh tur an ngah a, manager tan player siksawi thiam a ngai dawn hle a ni.