Semifinal-ah Swiatek a lut

Iga Swiatek chuan Madrid Open semifinal a lut. Nilaini zan khan Swiatek hian Petra Martic chu 6-0, 6-3 in a hneh a, final lut tur chuan seeded 12-na Veronika Kudermetova a hneh leh a ngai dawn a ni.

A dam ṭha a nih phawt chuan Swiatek hi player dang tan hmachhawn a harsa thei hle. Set khatnaah phei chuan game a hloh miah lo a, set hnuhnung zawkah pawh harsatna liantham a tawk miah lo.

Polish nula Swiatek chuan, "Nitin mai hian hmasawn ngaihna lai ka nei a, chumi chu ka ti hlawhtling chho ve zel ni pawhin ka hria. Tournament ka khelhtirh lam ai kha chuan tunah hian nasa takin hma ka sawn tawh," a ti.

Swiatek khingpui tur Kudermetova hian inkhel dangah world number 3 Jessica Pegula chu 6-4, 0-6, 6-4 in a hneh. Season kal laiah Kudermetova hian Adelaide leh Doha Open-ah khan semifinal a lo lut tawh bawk.