Frankfurt-in final an lut

DFB Pokal semifinal-ah mualneitu VfB Stuttgart-in goal khung hmasa mah se Eintrancht Frankfurt-in an lehthal a, Frankfurt hi 3-2 in an chak. Kumin German Cup final-ah RB Leipzig leh Frankfurt te an inhmachhawn ang.

May 3, Nilaini zan inkhelah Stuttgart-in bul an ṭan ṭha a, Tiago Tomas-a'n minute 19-naah kawh zetin goal ban perin a pet goal.

Stuttgart-in an goal dang an khung belh thei lo a, Tomas-a'n keeper tihper chang fuh mah se goal ruakah a khung lo.

Second half-ah Frankfurt an tho chhuak a, Evan Ndicka-a'n minute 51-naah siphurh sutna ṭha zetin an khung. Minute li hnuah Daichi Kamada chuan amaha a khalh luh hnuah box pawnah petna tur insiamin hmahruaina goal a khung.

Stuttgart-in an nawr luat an tuar lo a, Kamada hmangin Frankfurt-in an vaw let a, keeper Fabian Bredlow-a'n Randal Kolo Muani a tihtluk avangin penalty a chawi. French forward Muani hian Frankfurt goal thumna a khung.

Mualneitu Stuttgart an beidawng duh lo a, Enzo Millot hmangin minute 83-naah siphurh an sut ṭhen. Hun tawp lam boruak a ṭang a, Stuttgart player Borna Sosa chu hnawhchhuah a ni. Chutihrualin player 10-a khel chungin Stuttgart-in na takin an nawr a, goal erawh a lut tawh lo. Frankfurt an ṭang tluan hram.