Serie A champion Napoli

"Napoli chuan damlai pialral kan chen asin, min lo hmu ve ang tiraw Diego Maradona..." tiin Italy rama infiamna chanchinbu lian La Gazzetta dello Sport chuan an ziak - Serie A champion vangin Naples khawpuiin hlimna vawrtawp an thleng; Maradona an theihnghilh lo.

Italian football inelna sang ber Serie A-ah Napoli chu kum 33 hnua a vawi khat nan an champion leh ta. Ningani zan khan Luciano Spalletti naute hi Udinese nen 1-1 in an inhnehtawk, khelh hmabak match panga la awm mah se midang tan umphak theih an ni tawh lo a ni.

Udinese tana Sandi Lovric goal khung chu Victor Osimhen-a'n tun season a league goal 22-na hmangin a sut a, point khat hlawhchhuak zuiin an champion nan a tawk - thil dang mamawh an nei tawh lo, champion lawmna thangvelin khawpui a khat chhunzawm nghal.

Napoli coach Luciano Spalletti chuan, "Napoli mipuite hian huan harsa leh hrehawm kan tawh lai khan min thlahthlam lo a, hetianag hlimna vawrtawp thlen hi an phu a ni," a ti a, a lawm danah chuan nasa lutuk a awm thei lo ang tih a sawi bawk.

An nghak chhuak

Napoli hian tun hmain Serie A nomawi vawi hnih an chawi tawh. Legend Maradona hoin 1987 leh 1990 khan an champion, a hma lamin an la champion ngai lo a, a hnu lamah pawh tun ṭum hi an champion leh vawi khatna a ni.

An champion hnu khan harsatna hrang hrang an tawk, sum leh paiah an talbuai chhunzawm - Serie A aṭangin an tlahniam a ni satliah lo, kum 2006 mai khan Serie C lamah an la inlan zak zak, an thawnthu hi a tluang purh bik lo hle.

Tun hnai season 11 chhungin Coppa Italia nomawi chu vawi thum an chawi ngei mai, mahse an duh leh ngaihhlut ber mai 'Scudetto' erawh an tan vana rah ang mai a ni ṭhin, tunah erawh an duhthusam ram kha a tak a chang ve leh ta.

Hlawhtlinna chanpuitu Italian manager Spalletti hi kum 64 mi a ni - Serie A bikah chuan manager zinga champion thei upa ber a ni hial, team enkawl tura an rawih tirh khan champion chu duh mah se an beisei ngam kherin a rinawm loh.

Naples boruak

An champion dawn nia a lan aṭang khan awmngaihna an hre lo a ni ber mai. Rome leh Milan dawtah chuan Naples hi Italy rama khawpui lian a ni a, an kawtthlerte chu Napoli FC jersey leh team rawng angin an chei rang nasa hle.

An match hmasa zawkah pawh khan champion thei dinhmunah an ding a, mahse hun ṭha an bawhpelh. Udinese nena an inkhelh dawn pawh hian stadium chhunga leng lo fans 10,000 chuang an zin chhuak a, ball an pet ṭan hma aṭangin a lawmna hla an sa ṭan tawh.

Hamrik hnuhnung a rik rualin Naples kawtthlerah mipui an chhuak khawm a, lawm avangin an sapatal. An zai a, an lam a, naupang ten kawng sirah football an pet sup sup bawk - football atchilhna hmun a ni bawk a, an tan chuan hetiang aia lawmna tur dang a awm chuang lo.

Rome khawpui lama University-a lehkha zir lai, champion lawm tura Naples khawpuia haw Amelia Bufi chuan, "Kan tan chuan khawvela lawmna hi he hmunah hian a awm kim a ni ber mai, champion lawmna thil tih hian a awh rei khawp ang," a ti.

Ngaihlai Diego Maradona

Diego Maradona-a'n Napoli a zawm lai khan Naples khawpui kha an rethei hle - Maradona an neih hma kum li lekah khan lirnghing na takin a nuai a, mipui 2500 vel bawr an thi hial - mirethei an tam zual a, hnathawh tur nei lo an tam bakah Bank meuh pawh an tlachhe nasa.

Kum 1984 July thla khan Napoli chuan khatih laia player man tam ber ni turin Maradona chu Barcelona aṭangin an lalut, a hunlai khan Napoli hi Italian club lian a ni phak lo a, a vantlang hnuai lam mah an ni zawk.

Maradona an lei theih nan khan club president Corrado Ferlaino chuan an khaw rolreltute hnenah sum leh paia puihna a dil a, fans lamin an neih ang ang an thawhkhawm hial niin an sawi - Maradona an neih theihna tur a nih chuan engkim an huam a ni ber mai.

A tawi zawngin, an duh ber Maradona chu an nei ta ngei a, ani hian an la tawn ngai loh Serie A nomawi chu a chawipui ta mai. Argentine legend hian 1987 leh 1990 khan a champion pui, an tan chuan hei baka sang beisei leh tur chuang a awm lo.

Maradona hi kum 2020 November 25 khan a thi a, an club legend hming hian an khelmual pawh Diego Armando Maradona Stadium tiin an thlak hial. Kawtthlerah Maradona thlalak lian tak takin an tar a, hlawhtlinna an chan boruakah pawh an phawrh thar nasa hle.