Phuba lak duh Granit Xhaka

A la rei lo, kum khat liam ta chauh kha a la ni. Champions League khelh beiseina nei chungin Arsenal chuan Newcastle United an tlawh a, 3-0 in an tlawm haw - Gunners tan UCL ticket beiseina a bo zui nghal bawk.

Pathianni zan dar 9:00 hian St James’ Park-ah Mikel Arteta naute an lenglut leh dawn. North London club hi champion beiseina nen an lenglut dawn a, mikhual thleng tur Magpies hi UCL khelh beisei lai an ni thung.

An beiseina tihtawpa a awm hnua Arsenal midfielder Granit Xhaka thusawi khan sawi zui a hlawh. Xhaka chuan, "Hetiang inkhel tura inpeih lo chu inah khan awm mai zawk tur a ni. Kum engzat nge kan ni tih lam a ni lo, kum 30 emaw, kum 35 emaw pawh ni se.

"Kum 10 mi lek kan ni emaw, inkhel tura kan inpeih lo a nih chuan ina awm a ṭha zawk. Huaisen taka inkhel ngam kan mamawh, kan khelh dan kha chu pawm theih a ni lo," tiin a sawi chhuak hmiah a nih kha, tuna an intawn leh turah pawh Granit Xhaka bawkin titi a titam.

Tun hnaia an chetsual zauh zauh hnuah Arsenal an harh chhuak leh tawh. North London club hian Chelsea 3-1 a hnehin an boruak an siamṭha a, inrintawkna nei sang ve tak Newcastle United nen an inkhel tur hi a hmuhnawm ang.

Xhaka chuan, "Season hmasa kan inkhela thil thleng kha kan la hre reng, zep loha sawi chuan kan beisiena an hmet mit a nih kha. A hunlai kha chuan keini aiin an ṭha zawk, tunah erawh thawnthu a danglam tawhah ka ngai.

"Newcastle hian nasa taka hmasawnin an insiamṭha tih ka hria, chutihrual chuan keini lam pawh thla 12 liam ta nen chuan khaikhin chi kan ni tawh bik lo ang. London khawpui lamah point thum hawn turin kan inpeih," tiin an inrintawk thu a sawi.

Arsenal tan champion tur chuan Manchester City chetsual chân a ngai tawh. Citizens hian Champions League leh FA Cup khelh tur an la nei a, chuvangin chesual thei an la ni, mahse Gunners hi an chak vek ang em, tih pawh sawi lawk theih a ni bik lo.

Xhaka chuan, "Premier League-ah chuan thil thleng thei lo tak tak a awm lo, mite hian kan chanchin ṭha leh ṭha lo lam sawi tur an hre vek. Chuvangin champion beiseina kan nei reng tur a ni a, a tawp thlengin tha kan thlah tur a ni lo," a ti.

Eddie Howe enkawl Newcastle hi Arsenal tan awlsam taka paltlang chi erawh an ni dawn hauh lo. Tun season league match 33 an khelh tawh china goal chhuah tlem ber (27 goal) an ni a, an tlarhnung a khawng ṭha hle.

Tlarhma lamah Alexander Isak an nei, ani hi Arsenal nen pawha sawizawm ṭhin tawh kha a ni. Isak bakah hian Callum Wilson-a'n goal khung a harsat lo, Joe Willock leh Joelinton te hian William Saliba awm lohna Gunners tlarhnung sawinghing turin theihna an nei a ni.