Liverpool tan beisei neih a thiang!

Jurgen Klopp-a'n Champions League beisei chu an tan thil âtthlak niin ngai mah se Liverpool tan kawng hawnin a awm zel a, Reds ṭantuten European football-a club inelna sang ber an mangphan leh ṭan a nih pawhin dem ngawt a rem lo.

Liverpool hian zanin dar 10:00-ah season hmang ṭha tak Brentford an mikhual dawn a, palina Manchester United an thlauhna chu point li chiah a ni mek - United hian Ningani zan khan Brighton & Hove Albion chu 1-0 in an ngam lo a, an hmelma Liverpool tan lawmna dar an khawng ri.

Mahse, Liverpool fans tan lawma phul hlut a la hun lo. United hian match khatin an la khel tlem zawk tih hriat a ṭha a, tuna an lawmna thlentu Brighton ngei pawh hi an tan hnawksak an la chang thei - anni aiin match hnihin an khel tlem a, point li chiahin Liverpool an sang zawk.

Liverpool tana tih theih sang ber chu hmabak match-a hnehna chan vek a ni a, an khingpuite chetsual chan tel a ni bawk - hei vang hian an hna hmasa tur chu zanina Brentford hneh a ni.

Harhtharna

Liverpool hian tun hnaiah harhtharna an chang tih loh rual a ni lo a, an league match hnuhnung pasarihah tlawm an nei leh tawh lo - match hnih an draw a, a hnuah match nga chhung chu a zawnin an chak.

Klopp leh a naute an harh tlai mah mah em, tih chu hunin a la hril tur a ni a, tuna an tihtheih chu an harhna chan chhunzawm zel a ni. Mahse, Brentford pawh hi an insiamṭhat lai tak a ni a, an league match hnuhnung pathumah tlawm an nei lo.

Liverpool tan awlsam taka chak theih a ni bik lo tih a lang chiang a, Klopp-a'n Fulham laka goal an chhuah loh hnu lawka, "Alisson chu a ṭap ṭep hial a ni," a tih fiamthu hial angin, tlarhnung ven uluk a ṭul ang.

Brentford hian tun season Premier League-a goal 20 khung tawh Ivan Toney an nei a, vawi khat chetsuala Liverpool hrem nghal turin English striker hian theihna a nei sang tawk.

Hlimthla

Klopp-a'n season tawpa an khelh dan chu season thara Liverpool khelh dan tur hlimthla a nih tel thu a sawi a, season chawhma lama sawisel hlawh tak Trent Alexander-Arnold chu midfield-ah lut a, duhthala tal tura zalenna pek niin, a khel a hmuhnawm ṭhin hle.

Tlarhmaah Mohamed Salah a la rintlak reng a, Diogo Jota leh Luis Diaz ten ngai an awh chho ṭan a, Darwin Nunez-a'n beisei la phak lo deuh mah se Cody Gakpo hi a tlangnel ṭan ta viau bawk.

Liverpool chet chhiat lai zawng pawha sawisel tawk lo chu keeper Alisson a ni a, left back Andy Robertson-a'n ngai a awh leh ṭan a, hetihruala buaina langsar chu Reds chet ṭhat chhan ber ṭhin Virgil van Dijk hi a ni.

Dutch defender hian zep rual lohin season dang a phak lo tih a lang chiang a, zaninah a chesual a nih ngat chuan a mualphona belhchhahin a awm ang - defender ni chunga UEFA Men's player of the year ni thei tan harh a hun e.