Big Sam-a tan fiahna thlanawm loh City

Leeds United-in Premier League-ah match li chiah khelh tur an nei tawh a, table-ah 17-na dinhmun luah mekin, 18-na Nottingham Forest nen an point hmuh zat a inang mek. A tawi zawngin - tla thei dinhmunah an ding.

Hei mai a ni lo. Manganna belhchhahtu chu fixture hautak lutuk hi a ni a, Leeds-in an la hmachhawn turte hi Manchester City, Newcastle United, West Ham leh Tottenham Hotspur an ni.

Leeds hi Premier League aṭangin tla chiah se, season khata an sum hloh tur hi pound maktaduai 150 chuang a ni dawn a, an kir leh theih hun tur lah sawi lawk theih a ni lo - hei vang hian 'risk' an la a, Javi Gracia banin Sam Allardyce an la.

'Relegation specialist' ang hiala sawi coach hian match li chhungin £500,000 (Rs. 5,13,86,200) a hlawh dawn a, Premier League a inhamtanpui chuan pound maktaduai 2.5 bonus a dawng dawn bawk - zanin dar 7:30-ah City an lenchilh ang.

Ka dil loh zawk

Big Sam-a'n Leeds boss ni tura lakluh a nih hnu lawkah, "Kum 68 ka ni tawh a, mahse, football thlirna aṭanga thlir chuan kei aia sang bik an awm lo. Pep Guardiola, Jurgen Klopp leh Mikel Arteta pawh ni se, ka chunga leng an ni lo," a ti ngat a, a thawm a na nghal hle.

City boss Pep pawhin fing takin, "Sam-a thusawi hi a dik a ni," a ti a, English coach-te nen huang khata an awm thu a sawi. Zaninah Big Sam-a'n a tiahpuia a ngaih Pep-a City a hmachhawn dawn a, point thum a hlawh chhuak thei ang em, tih chu zawhna awm mek a ni.

Big Sam hian Sunderland leh Crystal Palace chu Premier League tlak hlauhthawnawm aṭangin a lo chhanhim tawh a, champion dan a hre lo a nih pawhin relegation zone aṭanga team talchhuahpui dan hriat kawngah ani aia ṭha an awm bik kher lo mai thei.

Mahse, buaina pakhat a awm - City hi Arsenal nena champion tuma inum mek an ni a, Pep-a naute hian champion nawmzia an tem fo tawh avangin nomawi chawi an duh dawn. Hei vang hian Big Sam tan hna a awlsam lo ang tih a chiang.

Boruak a ṭha

League match nga chhung chu a zawnin Leeds an chak lo tawh a, heng zinga match liah hian tlawmin, match khat draw an nei - team boruak a chhia ang tih chu chiangsa a ni a, hemi siam rem ringawt pawh hi a hautak dawn.

Mahse, Sam chuan, "Training boruak pawh nuam taka kalpui kan tum a, chumi kawngah chuan assistant coach Robbie Keane aia ṭha an awm chuang lo. Player-te zingah talin, an innel nghal em em a, Karl Robinson kan nei bawk a, training ground nuam tak siam hi kan tum ber a ni," a ti a, an boruak pawh a zangkhai tawh thu a sawi.

Leeds-in player inhliam tharlam sawi tur an nei lo a, Etihad Stadium-a chak beisei ngamna turin Patrick Bamford leh tun season-a goal 13 khung tawh Rodrigo te an chet ṭhat a ṭul dawn bawk.

Hetihrual hian Leeds tan beiseina siamtu pakhat a awm. Thawhlehni zan hian City-in Champions League semifinal first leg an khel dawn a, khualmualah Real Madrid an lenchilh dawn - European champion nih châk City hian player ṭhenkhat an hahchawlhtir a nih pawhin a mak lo ang.

City dinhmun

Premier League player hmuhnawm ber pawl, City playmaker Kevin De Bruyne-a'n an match hnuhnung pahnih chu hliam vangin a khel lo tawh a, a hliam dinhmun hi chiang taka sawi a awm loh avangin zaninah a inlan dawn em, a sawi theih loh.

KDB tel lohna City hmachhawn hi Leeds-in a telna ngei ai chuan hmachhawn an châk zawkin a rinawm a, chutihrual chuan City hian Belgian midfielder tel loa an league match hnuhnung pahnihah goal nga an khung tih hriat a ṭha.

Erling Haaland goal khung theihzia inhrilh nawn a ngai lo a, goal 67 chhuah a, tun season Premier League-a goal chhuah hnem ber ni mek Leeds tan ani ven hi hnapui ber a ni dawn.

Chutihrual chuan City leh Real inkhel tur a sawi lan loh theih loh a, Pep-a'n Santiago Bernabeu-a inkhel tur atan Norwegian striker hi a khek a nih pawhin world champion striker Julian Alvarez a la kawl cheu bawk.