Brighton-in United lakah phuba an la

Brighton & Hove Albion chuan FA Cup semifinal-a an hneh loh Manchester United lakah phuba an la a, Ningani zan Premier League inkhelah injury time-a Alexis Mac Allister-a penalty hmangin 1-0 in an hneh. Seagulls-in season thara Champions League khelh beiseina an nei chhunzawm zel.

Game mawi

Brighton hian season ṭantirh lamah manager Graham Potter chu Chelsea lakah an chân a, player pawimawh Yves Bissouma, Marc Cucurella leh Neal Maupay ten nipui bazara an chhuahsan bakah January bazarah Leandro Trossard a chhuak leh bawk.

Mahse, Seagulls hian Roberto De Zerbi hnuaiah Potter-a hunlaia an game ṭha tak aia game mawi zawk an khel a, team lian lakah pawh defensive game khel mai loin an game duh dan takin an khel chhuak.

Man United lakah pawh Seagulls hian ball an chang tam a, midfield-ah Alexis Mac Allister a hmuhnawm a, mual sirah Kaoru Mitoma a hlauhawm a, Erik Ten Hag-a hote lakah inkhel an thunun.

Mitoma-a'n a hun ṭha neih chu keeper David de Gea hmai pet per nan a hmang a, Japanese winger hian a ṭhiante pe zawk se chuan Seagulls hi first half-ah hmahruaitu an ni thei hial ang.

Chutihrualin United pawhin inkhel ṭantirh lamah chuan goal chance an nei a, Anthony Martial a hriam tawk loh bakah Marcus Rashford leh Antony te pawhin an hun ṭha neih an hmang ṭangkai bik lo.

Danglamna penalty

Brighton-in game mawi khel mah se goal khung turin vanneihna an mamawh a, injury time-ah United defender Luke Shaw chu box chhungah ṭul lo takin a hand ball. Shaw pawhin, "Ka kut ka phar chhan ka hre lo," tiin a thil tih chu mak a tih thu a sawi.

VAR hmanga ennawn a nih hnuah Seagulls hian penalty an hmu a, injury time-ah pawh minute kuanaah Mac Allister chuan penalty aṭangin chakna goal a khung. Brighton hian 1-0 a hnehna an chan zarah match 32 aṭangin point 55 an hmu a, khelh zat inangah an chunga awm Liverpool aiin point an hmu tam thei zawk.

Brighton hian May 8, Thawhṭanni zanah Everton an mikhual dawn a, season thara Europe khelh an duh a nih chuan point thum hlawhchhuah ngei a ṭul dawn. Man United-in West Ham an tlawh dawn a, Erik Ten Hag-a hote hian season tawpah presure nasa tak pumpelh an duh a nih chuan Hammers hi an hneh a ṭul.

Ten Hag-a hote hian tun season khualmualah tuna top 10-a awm team pakhatmah hi hneh an nei lo a, Spurs khelmualah point khat an hlawhchhuah kha top 10-a awm team khelmuala point an hlawhchhuah chhun a ni.