Copa del Rey - Real hmaah beiseina neitu Osasuna

Tun kartawpah Spanish La Liga inkhel en tur a awm dawn lo a, mahse, football fan-te nghahhlelh match pakhat erawh a thleng dawn - Copa del Rey final khelh a ni dawn.

Real Madrid-in an club chanchina a vawi 20 nan Copa del Rey nomawi chawi an tum dawn a, zanin dar 1:30-a an tawn tur Osasuna tan erawh an champion chuan an club chanchina a vawi khat nana nomawi liantham an chawi hmasak ber a ni dawn.

Hei ringawt pawh hian team pahnih inthlauhna chiang takin a hrilhfiah a, Osasuna tan chuan Real chu cho loh leng an ni. Mahse, he team hian football-ah chuan eng pawh a thleng thei tih an hre chiang a, zaninah chak tumin an inlan ang.

Osasuna manager Jagoba Arrasate chuan, "Anni chuan he nomawi hi vawi tam an lo chawi tawh a, keini erawh kan la champion ngai lo - chuvangin danglamna a awm a ni," a ti a, champion an châk zawk thu a sawi - tun season La Liga-ah team pahnih hi vawi hnih an intawng tawh a, vawi khat inhnehtawkin, vawi khat chu Real an chak.

Hello Osasuna

Osasuna hian danglamna tak an nei a, an club innghahna Navarra chhehvela chengte chuan, "Kan tlawm ve ngai lo," tih chu hman aṭang tawha inchhuan nan an hman a ni a, hnam huaisen bikah an inchhal.

Zaninah pawh he team hian nomawi chawi ngei tumin an bei dawn a, player 'class' a insan hleih avangin huaisenna ringawt hian eng chen nge a thlen ang, tih chu thil hriat châkawm a ni.

Osasuna hian Copa del Rey final lut turin anni aia team ṭha zawka ngaih Real Betis, Sevilla leh Athletic Bilbao te an paltlang thei a, chutihrual chuan Real erawh an hneh tak team nen khaikhin chi an ni lo ang.

Argentine forward Chimy Ávila, Spanish forward Kike García leh Morocco international Abde Ezzalzouli te tan an theihna tak tak pholan hun ṭha a ni a, chance an neih chhuna Real hrem thei turin inbuatsaih an mamawh.

Real beiseina

Madrid khaw club-in an league match hnuhnung berah Real Sociedad chu 2-0 in an ngam lo a, Carlo Ancelotti nauten league nomawi chawi an beiseina chu an mangṭha tawh tiin a sawi theih.

King Carlo hming lem an pek Ancelotti pawhin an tan La Liga nomawi beiseina a tawp tawh thu a pha lo a, mahse, hei tak hi Osasuna tan a pawi thei - Real hian Copa del Rey hi chu chawi an duh dawn.

Ancelotti chuan, "Copa del Rey nomawi chawi duh leh Champions League final luh ngei tum kan la hmu leh ang tih ka ring tlat a, kan hmaah hian zanin ami ni lo, team dang kan hmuh ka beisei tlat a ni," tiin Real Sociedad an ngam loh hnuah khan a sawi a, zaninah a naute aṭangin beiseina a nei sang.

Italian coach chuan, "League-ah hian kan kal tluang hlei thei lo a, kan tlahniam hle. Mahse, vanneihthlak takin inelna dang pahnihah beisei tur kan nei a, ṭha taka season khar kan tum ang," a ti a, champion a tum.

Real an dam

Madrid khaw club-in Sociedad lakah hliam vangin striker chhuanvawr Karim Benzema, midfielder Luka Modric leh centre-back David Alaba te an chhawr thei lo a, hrem vangin winger Vinicius Junior a inlan thei lo bawk.

Zaninah erawh Real an dam kim - squad-ah Benzema, Modric leh Alaba hming hmuh turin a awm a, Vinicius hrem a ni tawh lo bawk. Real squad en ringawt pawh hi Osasuna tan chuan khurhna tham tling tur a ni!

Osasuna danglamna erawh an academy chhuak player an kawl hnem hi a ni a, naupan lai aṭanga khel ho tawh an tam avangin he team hian an thawhhona ṭha leh inlungrualna chu Real lakah an hmachhuan ang.

Real hian Thawhlehni zanah Champions League semifinal an khelh dawn bawk avangin ngaihtuah tur dang an nei tel a, Osasuna erawh kartawp inkhel tur bak lungkham nei loin an inlan dawn - Jagoba Arrasate nauten thawnthu ngaihnawm ziah an tum dawn e.