Max hneh turin tihsual neih a rem lo - Perez

Pathianni zan dar 1:00-ah Formula 1 Miami Grand Prix an tlan dawn a, driver championship lama inel lai Red Bull driver pahnih chu mipui enbik an nei leh dawn - Sergio Perez chuan Max Verstappen khum tur chuan tihsual neih a thiang lo tih a sawi.

Tun season intlansiak an neih tawh hoah Red Bull driver pahnih hian hnehna an inchan sem, midang tan hmun an la kian lo. Miami International Autodrome-ah pawh hian rinkai an ni leh dawn.

Perez hi Verstappen aiin point rukin a hniam zawk mek. World champion vawi hnih ni tawh Verstappen tan pawh a nomawi humhim tur chuan chetsual a thiang bik lo tihna a ni - team thuhmun ni mah se mimal inelna an nei ang.

Mexican driver Perez chuan, "Red Bull team hian Max-a an thlawpna ang chiah tho hian min thlawp chhunzawm ve ka beisei. Intlanisak hnuhnung ho kha kan en chuan kan inum tawk thei em em a, chuvangin second khat lek pawh a hlu thei hle.

"Ka tan chuan champion sawi hun a la ni lo a, chutiang sawi thei dinhmunah pawh ka la ding lo. Ka sawi theih awmchhun chu Max khuma Formula 1 title la tur chuan tihsual neih a thiang lo," tiin a ṭawng fimkhur hle.