Nomawi inchuhnaah kan nihna kan lantir a ngai - Tuchel

Bundesliga-ah champion tur a la chiang lo a, kar liam ta khan Borussia Dortmund an chetsual avangin champion lai Bayern Munich-in hma an hruai leh tawh. Chutihrualiin Bavarians hi an chesual a nih chuan Dortmund hian an lehthal thei lehnghal a, club ṭha pahnih inthlauhna hi point khat chauh a ni.

Zanin dar 10:00 hian Bayern Munich-in table-a 12-naa awm mek Werder Bremen an lenchilh dawn. Bavarians boss Thomas Tuchel chuan, "Kan hna tur kan chian a ngai a, rilru tih hahdam a ṭul. Player-tinin an tih tur ṭheuh an tih a ngai. Nomawi inchuh boruak a sang a, hetah tak hian kan nihna kan lantir a ṭul a ni," tiin a sawi.

Chelsea manager hlui Tuchel-a'n Bayern a enkawl tirh khan Borussia Dortmund hneh nghal mah se DFB Pokal leh Champions League aṭangin an tla a, nomawi lian tham zingah Bundesliga-ah chiah champion theihna an nei tawh.

Bavarians hian hliam vangin Dayot Upamecano, Eric Maxim Choupo-Moting leh Alphonso Davies te an chhawr thei dawn lo a, hrem vangin Leon Goretzka an chhawr thei dawn lo bawk. Bayern an kim dawn lo a, chutihrualin point hloh erawh a thiang lo.

An hmachhawn tur chungchang sawiin Tuchel chuan, "Bremen hian attacking game an khel a, striker pahnih an chhawr. An mual Weserstadion-ah boruak ṭha tak an nei ṭhin a, chumi hmachhawn tur chuan kan inpeih a ngai. Counter attack hmangin kan nawr a, chu chu kan dah theih a ngai a ni," tiin a sawi.

May 6, Pathianni zanah Borussia Dortmund-in Wolfsburg an mikhual dawn a, inkhel pawimawh awm laia English midfielder Jude Bellingham leh Real Madrid an sawizawm chu club tan chanchin lawmawm a ni lo. Club director Sebastian Kehl chuan, "Bundesliga champion hi tuna kan tum ber chu a ni," tiin Bellingham chungchang a sawi duh lo.

Chutihrualin khawthlang media-te chuan Bellingham hian nipui bazarah Real Madrid hi zawm ngei turin an sawi a, inremna pawh an nei hnai niin an ziak. Hetiang boruak karah hian Bellingham hian 100% a pe thei ang em tih hi zawhna a ni a, Wolfsburg an mikhual hi khelmual pawn boruakin a tibuai em tih chu a hriat ang.