Risk kan la fuh - Rana

Kolkata Knight Riders chuan Ningani zan Indian Premier League-ah Sunrisers Hyderabad chu run ngain an hneh. Inkhelh banah KKR captain Nitish Rana chuan risk an lak fuh thu a sawi.

Kolkata Knight Riders hian an bat hmasa a, top order lam che ṭha lo mah se Nitish Rana (42), Rinku Singh (46) leh Andre Russell (24) te zarah 171/9 runs an tlin.

KKR tan Vaibhav Arora leh Shardul Thakur te an che ṭha a, Haryana-a piang Arora-a'n wicket hnih lain Sunrisers captain Aiden Markram (41) a vawm hlum chu a pawimawh hle.

India tan pawha khel fo tawh Shardul Thakur-a'n opener Abhishek Sharma (9) leh Heinrich Klaasen (36) a vawm hlum leh bawk. Hetichung hian Sunrisers hian chak turin over tawp berah run kua chauh siam an mamawh a, Varun Chakravarthy chuan run thum chauh a pe.

KKR captain Rana chuan, "Shardul leh Vaibhav te risk lain kan vawm tir a, batter dinhmun sawhngheh tawh an vawm hlum ve ve. Anni zarah khan chak thei lo dinhmuna kan din hnuah hnehna kan chang a ni," tiin a sawi.