Swiatek hmachhawn tur Sabalenka

Madrid Open hmeichhe final chu zanin dar 10:00 hian khelh a ni dawn, world number 1 Iga Swiatek leh world number 2 Aryna Sabalenka ten an inhmachhawn ang - a ṭha bik pahnih inkhel tur hi a hmuhnawm ang.

Ningani zan semifinal inkhelah Swiatek hian Veronika Kudermetova chu 6-1, 6-1 in a hneh. Inkhel dangah Sabalenka chuan Maria Sakkari 6-4, 6-1 in a lo hneh ve bawk a ni.

Sabalenka hian 2021 khan Madrid Open nomawi hi a lo chawi tawh, tun season tir khan Australian Open title a la bawk - inrintawkna a nei sang hle, a khingpui tur Swiatek hi midang chunga leng lai a ni thung.

April thla tir khan Stuttgart Open-ah khan player pahnih hi an lo intawng tawh - Swiatek hian Sabalenka 6-3, 6-4 in a hneh. Tunlai khel ṭha leh kaltluang pahnih an nih avangin champion tur zawk rin thiam a harsa.

Mipa singles lamah Stefanos Tsitsipas a chak lo. World number 5 hi Jan-Lennard Struff lakah 7-6 (5), 5-7, 6-3 a chak loin quarterfinal-ah a zinkawng a tawp. Tun hnaia khel ṭha tak Aslan Karatsev pawhin Zhang Zhizhen 7-6(3), 6-4 in a hneh bawk.