Copa del Rey champion Real Madrid

Real Madrid chuan kum 2014 hnua Copa del Rey nomawi an chawi a, Inrinni zan khan Seville-ah Osasuna chu Rodrygo goal hnih hmangin 2-1 in an hneh.

Carlo Ancelotti hote hian May 9, Thawhlehni zan hian Santiago Bernabeu-ah Manchester City an mikhual dawn a, Copa del Rey nomawi hian UCL semifinal an khelh turah inrintawkna nasa tak a pe ang.

Goal thum

Second 106 lekah goal hmuh tur a awm nghal a, Real Madrid-in an khung hmasa zawk. Vinicius Jr-a'n mual vei lam aṭanga lalutin Brazilian winger hnathawh ṭha zet chu a hnampui Rodrygo-a'n minute hnihna lekah a khung.

Real Madrid an phur a, vei lam aṭanga Vinicius-a ball pek bawk chu Rodrygo-a'n Karim Benzema tan ṭha takin siamsak mah se French forward ball pet hi Osasuna keeper Sergio Herrera-a'n ṭha takin a dang.

Osasuna pawhin chance an nei a, Abde Ezzalzouli-a'n a harsa zawng zawng a thawhzawh hnuah keeper Thibaut Courtois pet khum mah se goalline aṭangin Dani Carvajal-a'n a pet chhuak.

Real defender David Alaba freekick petin crossbar a per a, first half-ah goal a luh belh lo. Second half-ah Osasuna zawkin goal an khung a, box pawn aṭangin Lucas Torro-a'n ṭha zetin minute 58-naah a pet goal.

Osasuna an phur thar a, chutihrualin Vinicius a hlauhawm reng. Mual sir aṭanga Vini ball lakluh chu Osasuna lamin hmun hlauhawm laiah an tiper thei chauh a, Toni Kross-a'n goal-ah petin defender dan per chu Rodrygo zawnah tak a tla a, Brazilian forward hian 'cool' takin minute 70-naah chakna goal a khung.

Real hian goal dang pawh khung belh thei an ni a, Vini Jr pawhin ṭha taka lalutin a pass fuh tawk loh avangin Benzema pet hmain keeper a rawn inrawlh hman a, 2-1 in inkhel a tawp.

Engtin zel?

Real tana chanchin lawmawm chu Osasuna an hmachhawn ṭum hian bench aṭangin Luka Modric a rawnlut thei a, Croatian midfielder hi UCL semifinal-a Manchester City an hmachhawn hunah bul a ṭan thei tawh ang.

Los Blancos hian Carlo Ancelotti let leh hnuah nomawi chawi theih ang zawng zawng an chawi vek a, Italian manager contract hi kum 2024-ah a tawp dawn. Real president Florentino Perez chuan, "Kum khat contract a nei a, hmun dang nena an sawizawm thawm ka hre lo. Ancelotti chungah kan lawm," tiin chhuahtir an tum lo.

Ancelotti pawhin, "Ka hmalam hun maw? Vawi tam tak tak sawi tawh. Kum 2024 thleng contract ka nei," tiin a sawi a, Italian manager hian Real ṭantute nen ban phar meuhin 'Hala Madrid' a sa zui.

Italian manager Ancelotti hian Real-a a let leh hnu hian La Liga, Copa del Rey, Supercopa de Espana, UEFA Champions League, UEFA Super Cup leh FIFA Club World Cup te an chawi vek.