Man City tan Gundogan a langsar

Manchester City chuan Inrinni zan khan Leeds United an mikhual a, Ilkay Gundogan-a goal hnih hmangin Pep Guardiola hote hian manager thar Sam Allardyce-a hote hi 2-1 in an hneh.

Etihad Stadium-a inkhelah Erling Haaland a vannei lo a, Norwegian striker hian goal khung theihna hun ṭha chu nei tho mah se goal khungtu zingah a tel lo.

Minute 19-naah Riyad Mahrez-a thawhrah sengin Ilkay Gundogan-a'n goal sirah a khung. Minute 27-naah Gundogan-a bawkin a pet goal a, Mahrez-a ball pek bawk chu box pawn chiah aṭangin goal kilah a pet.

Second half-ah pawh City bawk an chungnung a, Haaland-a'n goal ban a pet per. Phil Foden-a'n box chhungah a khalh lut a, penalty a hlawh chhuak. Haaland-a'n hattrick siam thei dinhmuna ding Gundogan a kian a, German midfielder hian goal ban a pet per.

Penalty hlah hnu lawkah Leeds forward Rodrigo Moreno-a'n minute 85-naah siphurh a sut ṭhen a, Pep Guardiola a thinur hle. Chutihrualin City erawh an chetsual vangin hrem an ni lo a, Leeds lakah hnehna an chang.

Man City manager Pep Guardiola chuan, "Inkhel a la zo lo. Erling-a felna leh thil phalna a lang. Mahse 4-0 ni se, minute 10 chauh awm tawh se a pawi lo. 2-0 chauh a la ni a, Erling kha penalty pet thiam ber a nih avangin a pet tur a ni," tiin a lungawi loh thu a sawi.

Chutihrualin Pep-a'n Gundogan leh Haaland te a fak a, German midfielder pawh cham tur a duh thu a sawi bawk. Leeds United erawh manager thar Big Sam hnuaiah an chak lo nghal a, an hnuaia awmte an chak a nih chuan relegation zone-ah an tla thei ang.