Reds beiseina siamtu Salah

Liverpool chuan Inrinni zan khan Brentford an mikhual a, minute 13-naa Mohamed Salah goal hmangin 1-0 in an chak. Fabinho ball vawrhluh chu Virgil van Dijk-a'n ṭha taka tauh letin goal ruakah Salah-a'n a khung.

Reds an khel ṭha a, inkhelah chungnung zawk niin Darwin Nunez a hlauhawm ṭhin hle. Chutihrualin Bees vanneih ṭum ni se siphurh sut thei an ni a, Bryan Mbeumo chu offside vangin VAR hmangin pawm a ni lo.

Jurgen Klopp-a hoten point thum hlu tak an hlawhchhuah avangin season thara UCL khelh beiseina an nei chhunzawm a, match 35 aṭangin point 62 an hmu mek.

Reds hian an hmelma Manchester United hi Inrinni zan inkhelh zawhah point khat chauhin an pha lo a, mah se Erik Ten Hag-a hote hi match hnihin an khel tlem. Nizan khan Man United-in West Ham an tlawh a, inkhel result hi Liverpool ṭantute pawhin an ngaihven ang.