Swiatek hnehin Sabalenka a champion

Aryna Sabalenka chuan world number 1 Iga Swiatek hnehin a vawi hnih nan Madrid Open nomawi a chawi, an intawn hnuhnung zawkah chak lo mah se Inrinni zan final-ah erawh a dingchang zawkah a ṭang.

Belarus nula Sabalenka hian 6-3, 3-6, 6-3 in hnehna a chang a, tun season kal lai atan title pathum a lakna a ni nghal - Madrid Open bikah hian kum hnih liam ta khan hlawhtlinna a lo chang tawh bawk.

January thlaa khelh zawh tak Australian Open-ah khan Sabalenka hi a lo champion tawh bawk a, hard court mai bakah clay court-ah pawh player ṭha bik a nihna a lantir avangin tun thla chawhnu lama khelh tur French Open-ah pawh rinkai a ni dawn.

Kum 25 mi Sabalenka chuan, "Ka tan chuan hlimna vawrtawp a ni. Iga-i ka hneh a ni satliah lo, hnehna ka channa hmun hi clay court a nih avangin a lawmawm zual hle. Ani hmachhawn hi chu a hautak em em zel.

"Tunah chauh pawh ni loin kan la inhmachhawn chhunzawm zel theih ka besei," a ti. Swaitek hian tun hnaiah amah elphak a tawng meuh lo a, tunah zet chuan Sabalenka hian nomawi mai bakah ranking thlengin a chuh buai chho dawn niin a lang.

Chak lo zawk Swiatek tan inenfiahna hun a ni dawn. Clay court inelna lian French Open-ah champion lai a ni a, a nomawi humhim ngei a tum dawn. A khelh dan pangngaia a khel chhuak leh thei a nih chuan midang tan tluk phak a harsa lehin a rinawm.

Nizan khan mipa singles final khelh a ni a, world number 2 Carlos Alcaraz leh Jan-Lennard Struff ten nomawi an inchuh - inkhel result erawh kan hre hman lo a ni.