Messi-a'n ngaihdam a dil

Lionel Messi chuan phalna hmu loa Saudi Srabia ram a tlawh chungchangah ngaihdam a dil. Argentina captain hi Paris Saint Germain lamin zin turin phalna an pe thei lo a, mahse a zin lui tho. A zin luih avang hian chawlhkar hnih chhung atan an hrem mek.

Messi hian PSG tana a contract neih lai chu June thla hian a hmang zo dawn a, season tharah chuan club dang jersey a ha dawn tih a chiang tawh. Tuna a lan dan chuan Paris club nen hian an boruak a ṭha lo hle.

Kum 35 mi Messi chuan, "Ka thil tih avangin pawi ka ti a, ngaihdam ka dil. Tunah hian club lamin eng ang thutlukna nge an siam tih chu ka ngaichang mek. Ka hriat dan chuan, match hmasa lamah pawh khan kan inkhelh zawh tukah chuan chawlh kan nei ṭhin.

"Saudi Arabia rama kal turin ruahmanna ka lo nei tawh, a hma pawhin ka lo ṭhulh tawh zawk, tun ṭumah chuan ṭhulh kha a remchang ta lo a ni," an ti. PSG chuan Messi hi inkhel thei lo tura an hrem bakah pawisa an chawitir bawk.

PSG fans ṭhenkhat chuan Messi hi an lawm vak lo, an duh ber Champions League nomawi a hlawhchhuahpui loh bakah club tana khel ṭha tawk lo tia sawisel a lo ni fo tawh, tuna thil thlengah pawh fans ṭhenkhat chu Messi te in kiangah an kal khawm hial.

PSG manager Christophe Galtier chuan, "Leo an hremna thu hi min hrilh a, kei chuan tih theih ka nei lo, kan khelh ṭhat loh lai boruak nen chuan thil duhawm tak a ni hran lo," a ti a, a chena in vela fans chet dan erawh Galtier hian ṭul lo a tih thu a sawi.

Messi chauh a ni lo, hliam vanga chawl mek Neymar in kawtah pawh PSG fans an pungkhawm - Brazil international hi Paris club chhuahsan turin an au el hial. Italy midfielder Marco Verratti leh coach Galtier te pawh an au el bawk.

Galtier chuan, "Player te chenna in leh a chhehvel a thil tih hi chu fimkhur a ngai hleah ka ngai, mimal nun hi chu engtik lai pawhin mimal nun a ni a, inzahsak tur a ni. Fans lungawi lohna ka hrethiam, mahse training-na leh khelmualah an thinrimna chu lantir zawk turah ka ngai," a ti.