James hoin Lakers an chungnung

LeBron James awmna Los Angeles Lakers chuan an mikhual Golden State Warriors 127-97 in an hneh a, Western Conference semifinal series-ah 2-1 in hma an hruai - May 9, Thawhlehni zing dar 7:30-ah game 4 an khel leh ang.

Quarter hmasa berah James hian point a nei miah lo a ni satliah lo, point nei turin a 'shot' miah lo! Mahse, inkhel a zawh meuh chuan point 21 a lo khawlkhawm leh hman tho a, an player pawimawh pakhat Anthony Davis (25 points & 13 rebounds) a langsar bawk.

Lakers player pawimawh Davis chuan, "Match hnuhnung zawkah khan kan tisual, kan tih fuh tawk loh lai kan siamṭha thei kha a lawmawm. Mahni kan inveng thei a, chubakah a hunah tak kan chu let chat chat thei kha kan lawmna belhchhahtu a ni.

"Inelna hi a la tawp lo, tuna a pawimawh hmasa ber atan chuan 3-1 a hma hruai kan tum tur a ni ang. Keini ang bawkin Golden State hi chak duh reng an ni a, khingpuite chetsual zeuhna lai hrem nghal thei an ni, kan fimkhur a ngai hle," a ti.

NBA Western Conference semifinal khelh laiah Phoenix Suns chuan Denver Nuggets chu 121-114 in an hneh a, game 3 an khelh tawh chinah Suns hian 2-1 in best of seven series-ah hma an hruai mek a ni.

Inrinni zing inkhelah Devin Booker chu Suns chakna hnar a ni, ani hian point 47 teh meuh a neih vakah assist vawi kua neiin rebond vawi ruk a la bawk - Kevin Durant chuan point 39 nei bawkin, player dang zingah point 10 nei tling awm lo mah se chak nan a tawk.

Tukin khan game 4 khelh chhunzawm leh nghal a ni. Conference final lut tur chuan a tlem berah vawi li tal chak a ngai a, chuvangin tukin inkhel result hmang chuan a tlang zawk tur a la chiang thei rih lo ang.

Eastern Conference semifinal lamah Boston Celtics chuan Philadelphia 76ers chu 114-102 in an hneh ve bawk - Celtics pawh hian best of seven series-ah 2-1 in hma an hruai ta chiah, tlang turin kawng chanve an zo.

Jayson Tatum-a'n point 27 a neih bakah rebound vawi 10 lain Celtics chakna hnar a ni a, inkhelh ṭan hmain Joel Embiid chu NBA Most Valuable Player (MVP) chawimawina hlan niin, point 30 a neih bakah rebound vawi 13 la mah se a team a chakpui zo lo a ni.