Table chung berah Bayern an awm chhunzawm

Bayern Munich chuan Inrinni zan khan Werder Bremen a thlawh a, Serge Gnabry leh Leroy Sane te goal hmangin 2-1 in hnehna a chang. Bavarians hian match 31 aṭangin point 65 an hmu a, an elpui Borussia Dortmund-in nizan khan Wolsburg an hmachhawn ang.

Thomas Tuchel-a'n bul ṭantu zingah Sadio Mane, Serge Gnabry, Kinglsey Coman leh Jamal Musiala te a dah a, mifield-ah Joshua Kimmich kawppui turin Ryan Gravenberch a thlang bawk. Bench-ah Leroy Sane leh Thomas Muller te an awm a, an squad a chhah ṭha hle.

Weserstadion-ah Gnabry-a'n inkhelh ṭantirh lamah Werder Bremen keeper a tibuai a, Czech keeper Jiri Pavlenka hian Benjamin Pavard-a tauh goal tur ṭha takin a dang bawk. Bremen pawhin midfielder Christian Gross hmangin chance an insiam a, Gross hian ṭha takin Bayern tlarhnung a paltlang vek hnuah a pet over!

First half-ah goal a lut lo a, Bayern chesual thei dinhmun an ding. Second half ṭantirhah Bayern an hlauhawm lehnghal a, Gnabry leh Mane ten chance ṭha hmasa an hlah. Minute 62-naah Bayern an vannei ta a, Mane ball vawrhluh chu Musiala pet sualin hemi per hi Gnabry zawnah chiah tlain anni hian chiang zetin a pet goal.

Minute 72-naah goal mawi hmuhin a awm a, Noussair Mazraoui ball fing chu Sane-a'n cool zetin goal kilah tak a khung. Bayern nuam sa taka chak turah a ngaih theih a, mahse beisei ang ngawtin thil a kal lo. Hun tawp lamah Bayern tlarhnung an che buai a, chutihrualin minute 86-naa goal luh danah erawh defender-te dem an har. Niklas Schmidt chuan box pawn aṭangin goal kilah tak a pet lut.

Bayern an ṭang tluan a, 2-1 in an chak. Goal khungtu Serge Gnabry chuan, "Hnehna hlu tak a ni. Hna ṭha tak kan thawk a, Schalke kan hmachhawn hunah pawh chak leh ngei kan tum," tiin a sawi. Bavarians-in chetfuh loh lai nei bawk mah se an elpui ber Dortmund an chesual ve zel a, match thum khelh hmabakah champion rinkai an ni leh ta.