Premier League-a goal khung tam pahnihna Kane
Premier League huangah Harry Kane chu goal khung tam pahnihna a ni ta. Tottenham Hotspur striker chungah hian goal khung tam ber Alan Shearer chiah a awm ta, a chung berah pawh a la lawn chhunzawm zel mai thei.
England captain hian Inrinni zan khan Crystal Palace lakah goal awmchhun a khung a, a team hi 1-0 a chak puiin table-ah parukna dinhmun an luah - Champions League khel phak tur erawhin an chunga mite an chetsual viau a ngai dawn.
Kum 29 mi Kane-a'n EPL match 317 a khelh aṭangin goal 209 a khung a, record inṭawm a neih pui Wayne Rooney a khum ta chiah. Goal 260 khungtu Shearer erawh a la hlat deuh, khum theih loh erawh a ni lo.
Spurs leh Palace an inkhel tawk viau, defender Christian Romero-a'n goal dar a tih per dawp bak goal hlauhawm a awm mai lo. Chawlhlawk hma deuhin Kane chuan goal awmchhun a khung.
Kane-a'n a ball chan chu mual sira awm Pedro Porro um turin a vawrh. Porro hian a insiamrem hnuah box chhungah a vawrh lut a, striker ṭha Kane chuan hnai zet aṭangin a lo tauh lut. Spurs tan Son Heung-min chuan keeper chauh a hmachhawn tawhah a khung lo thung.
Goal khungtu Kane chuan, "Kan rama player ṭha berte zinga mi Wayne Rooney meuh ka khum ta chu a lawmawm khawp mai," a ti a, goal khung hnem ber Shearer nen chuan an goal khung zat inkar a la zau hle tih a sawi bawk.
Newcastle United leh Blackburn Rovers striker Shearer khan match 441 aṭangin goal 260 a khung a, chawhrualin match khatah goal 0.59 a khung ang a ni. Kane hian tuna a khelh tawh chinah chuan match khatah goal 0.66 khung anga chawhrual a ni thung.
Spurs manager lailawk Ryan Mason chuan, "Harry Kane a goal khung chungchang hi chu thil thleng pangngai ang mai a ni a, a la thleng chhunzawm zel bawk ang. Tuna a rilru puthmang ang a neih reng chuan atan goal khung hi thil harsa a ni lo.
"Kan club tana mi hlu a ni a, ani ang player ṭha neih hi chuan team pumpui a ti phurin min ti chak ṭhin," a ti. Kane hian goal khung thei viau mah se nomawi erawh a la chawi lo a, champion tur erawhin hun a la nei.