Inter Milan club pahnih an chak

Inrinni zan Serie A inkhelah Inter Milan chuan AS Roma 2-0 in an hneh a, inkhel dangah AC Milan pahnihna dinhmun luah lai Lazio chu 2-0 bawkin an hneh - Champions League khelhna hmun inchuh boruak a ngaihnawm zel dawn.

Inter Milan an harh chhuak mek zel, goal khung harsat ṭhin khan an harsat ta lo. Jose Mourinho enkawl Roma inveng uluk viau mah se midfielder Federico Dimarco leh striker Romelu Lukaku ten Inter tan goal an khung.

Inter coach Simone Inzaghi chuan, "Midfield kan siksawi fuh hle a, tlarhma lam nen an inkawp rem kha a lawmawm takzet. Tlarhnung lama khel turah harsatna tlemte kan la nei, hei pawh hun rei lote chhungin kan chinfel theih ka beisei," a ti.

Roma lakah hian Inzaghi hian striker Lautaro Martinez leh Edin Dzeko te a hahchawlh tir thei, anni pahnih an chawlh lai hian Joaquin Correa leh Lukaku te an la awm tho avangin an squad a chhah ṭha thawkhat hle.

Nilaini zanah Inter leh AC Milan ten Champions League semifinal an khel zui leh dawn. Serie A nomawi chawi phak lo ve ve ni mah se European football inelna sanga an inkhel hi a hmuhnawm dawn a, an ngaipawimawh tih pawh a hriat.

Milan pawhin UCL semifinal atana inbuatsaihna an nei ṭha. Ismael Bennacer leh Theo Hernandez te goal hmangin Lazio an hneh a, hnehna an chan avangin lawm viau mah se forward ṭha Rafael Leao chu hliam vanga thlak a ngai.

Leao hi minute 11-na lekah lak chhuah a ngai a, a malpui dinglam hliam hi engtiang taka na nge a nih erawh a la hriat loh. Tun season Serie A goal 12 khungtu hi a hliam na a nih chuan Milan tan channa lian tak a ni ang.

Milan manager Stefano Pioli chuan, "Leao kha a hliam nat loh hram ka beisei. A pawimawh ber chu hnehna chan a ni a, inkhel pawimawh takah Leao te loa kan chak thei kha lawmna tur chu a ni," a ti.

Nizan khan Serie A tun season champion Napoli chuan Fiorentina an mikhual a, an champion hnua an match hmasa ber a nih avangin Diego Armando Maradona Stadium boruak a nung hle.