A hun a thleng ta: Zanin dar 12:30-ah Real Madrid Vs Man City

Manchester City-in Europe football inelna sang berah nomawi an la chawi lo ngai lo a, Pep Guardiola-a'n Barcelona a chhuahsan hnuah UCL nomawi a la chawi lo bawk. Pep-a hnuaiah City-in Premier League thunun mah se Europe inelnaah an champion thei lo a, zaninah Europe-a record nei ṭha ber Real Madrid hmaah fiahna hautak an hmachhawn ang.

Santiago Bernabeu-ah zanin dar 12:30 hian Premier League champion lai Man City-in Champions League champion lai Real Madrid hi an inhmachhawn dawn a, club lian pahnih hian player an neih ṭhat ve ve avangin inkhel en a châkawm hle.

Treble champion?

Man City hi Manchester United hnua treble champion leh theih hmasa ber dinhmunah an ding a, UCL bakah hian Premier League leh FA Cup-ah an la champion thei tihna a ni.

Treble champion thei an nih avang ringawt pawh hian City-in season ṭha tak an hmang tih a chiang a, chutihrualin an vanduai erawh chuan nomawi chawi lo vek thei an la ni tho.

Real Madrid erawh La Liga-ah an chetsual leh ṭhin avangin pathumnaah an tla thla a, Barcelona lakah nomawi an humhim zo dawn lo. Amaherawhchu kum 2014 hnuah Los Blancos hian Copa del Rey-ah an champion a, kar liam ta khan final-ah Osasuna an hneh avangin inrintawkna an ngah khawp ang.

Rinkai City

Man City-in Erling Haaland an kawl a, Norwegian striker hian Premier League-ah goal 35 khung tawhin record a siam tawh. UCL-ah pawh Haaland hian goal 12 a khung tawh a, season khata goal khung tam ber record (goal 17) Cristiano Ronaldo siam khum thei dinhmunah a la ding.

Chutihrualin Haaland hian record aia a mamawh zawk chu UCL nomawi a ni a, Europe inelna sang bera City hi a champion pui thei a nih chuan Ballon d'Or dawng tur pawhin a dinhmun a ṭha sawt ang.

Pep-a hote hian Europe-a record nei ṭha ber Real Madrid hmachhawn dawn mah se rinkai zawk an la ni tho. City hian Haaland bakah Kevin de Bruyne leh player ṭha rual an kawl a, Pep-a hnuaiah khelh dan nghet tak an nei bawk.

City hian Bayern Munich an hneh ṭumin John Stones chu midfield-ah an dah a, English defender hi a che ṭha hle. Chutihrualin Premier League final ang hiala sawi Arsenal nen an inhmachhawn ṭumah Stones hi defence laiah a awm leh thung a, Pep-a hote hian tactic pakhat chauh an nei lo tih chiang.

Pep-a'n ṭum dang ang bawkin Haaland a dah pawimawh dawn a, chutihrualin a thlawptu tur De Bruyne, Bernardo Silva, Jack Grealish leh Ilkay Gundogan te an chet ṭhat a la ṭul tho. Tlarhnung leh thlarhma thlunzawmtu Rodri hming lam hmaih a thiang lo bawk.

Real nge nge

Real Madrid-in player ṭha bik an kawl a, tawnhriat nei ṭha player pawh an nghah. Goalkeeper aṭanga striker thlengin UCL boruak sang tawng tawh vek an ni a, City phei chuan an inkhelh tawhna thlirin Karim Benzema ṭhatzia an hrechiang lehzual ang.

Chutihrualin tun season-ah Benzema a langsar tawk lo a, goal nawrna kawngah Vini Jr a thawh hlawk ṭhin hle. City-in Vini Jr an ven uluk a ṭul dawn a, Rodrygo Goes pawh an ngaihthah thiang lo.

Rodrygo hi match pawimawha goal khung ṭhin a ni a, City laka an 'comeback' ṭuma goal pawimawh pahnih khungtu kha niin kartawpa Copa del Rey-a an champion ṭumin goal hnih a khung bawk.

Boruak sangah midfielder tawnhriat nei ṭha an ṭangkai ṭhin a, Los Blancos hian midfield-ah Luka Modric leh Toni Kroos te an nei a, City an hmachhawn dawn avangin pressure an neih phah tawh lo ang.

Real Madrid boss Carlo Ancelotti chuan, "Chelsea kan hneh ṭum khan kan khel ṭha a, kan tlarhnung a phui ṭha bawk," tiin a sawi a, City lakah pawh tlarhnung tihphui an tum ang.

Haaland leh Vini Jr

Tun season Champions League-ah Erling Haaland a che ṭha a, goal 12 ngawt a khung tawh. Chutihrualin Norwegian striker hian assist vawi khat chauh a neih avangin goal-a a inrawlh zat chu vawi 13 a ni.

Haaland hnaih teuh ber chu Vinícius Junior a ni a, Brazilian winger hian goal ruk a khung bakah assist vawi ruk a nei a, vawi 12 goal-ah a inrawlh. Zanina inhmachhawn tur Haaland leh Vini Jr te hi goal-a an inrawlh zat thlir chuan an inthlauhna hi goal khat chauh a ni thung.