Goal 11 tehmeuh luhna kha!

Manchester City leh Real Madrid hi Europe inelna sangah hian an che ṭha ṭhin hle. Season liam ta pawh khan club pahnih hi semifinal-ah an inhmachhawn a, Real Madrid hi a vannei zawkah ṭangin an champion zui bawk.

Etihad Stadium-ah first leg khelh a ni a, City hian minute 11 chhung lekin Kevin de Bruyne leh Garbiel Jesus hmangin goal an khung hmasa. Los Blancos-in Karim Benzema hmangin first half siphurh ṭhut mah se second half ṭantirhah Phil Foden hmangin hma hruaina an belhchhah.

City hi 3-1 in hma hruai hman mah se Vini Jr hmangin Real-in siphurh an sut ṭhen lehnghal. Pep Guardiola hote bawkin goal an khung leh a, minute 74-naah Bernardo Silva-a'n khung belhin 4-2 a ni.

Real Madrid an beidawng duh lo a, second leg-ah 'come back' turin goal an mamawh tih an hria. Benzema penalty hmangin minute 82-naah an siphurh an sut ṭhen leh a, first leg hi 4-3 in a tawp.

Santiago Bernabeu-ah second leg khelh a ni a, minute 73-naah Riyad Mahrez-a'n City tan goal khungin 5-3 a ni a, City-in final an lut ngei dawn niin a lang. Mahse, minute 90-naah Rodrygo-a'n siphurh a sut ṭhen hnuah hun pek belh minute khatnaah Brazilian forward hian siphurh a sut zo.

Boruak a dang ta vek a, extra time-ah Real-in penalty an hmu a, Karim Benzema-a'n chakna goal a khung. Champions League-ah Real Madrid an danglam ṭhin a, Europe inelna sang bera la champion lo City lakah Real-in champion tawh danglamna an lantir a, a vawi 14 nan an champion zui bawk.