Arsenal beiseina a la nung zel

Premier League champion tum Arsenal chuan thla an thlah mai lo. Gunners hian a tawp thlenga beih an tum tih chu a takin an lantir - Pathianni zan khan Newcastle United chu 2-0 in an hneh.

Mikel Arteta naute hian hmahruaitu Manchester City nena an inkar chu point khatah an sawr zim leh ta a, mahse North London club hi match khatin an khel tam. Khelh hmabak an la neih nual avangin beisei an la nei thiang.

Laipui a puak

St James' Park hi season hmasa a Arsenal beiseina tih tawp a nihna hmun kha a ni - Champions League an khelh loh phah. Tun season chu chetsual nawn an tum lo a, mualneitu Magpies pawh an zam bik eih lo.

Jacob Murphy-a'n goal ban a pet per nghal pawp a, inkhel a nung nghal vet vet hle. Gunners defender Jakub Kiwior chuan a hand ball nia ngaiin penalty an pe, mahse VAR hmanga ennawn a nih hnuah penalty hi an hnawlsak - Arsenal an thaw huai ang.

Newcastle khel ṭha viau mah se Arsenal an che fuh hmasa zawk. Thomas Partey aia lut Jorginho-a ball pek chu Martin Odegaard-a'n yard 25 zeta hla aṭangin a khung, goalkeeper Nick Pope dan phak lohin goal kilah a lut.

Magpies keeper Pope-a'n hna a nei zui nual, forward Bukayo Saka nen chauh an inhmachhawn tawhah a ball pet a dansak, a hnu lamah Gabriel Martinelli leh Odegaard te khung tur pawh ṭha takin a dansak bawk.

Arsenal keeper Aaron Ramsdale a awm mai mai bik lo. Joe Willock leh Fabian Schar ten hna hautak zet siamsak mah se Ramsdale a chesual duh tlat lo a, striker Alexander Isak chuan goal ban a tauh per leh bawk a ni.

UCL khelh ngei tum Eddie Howe-a nauten nawr chiam mah se goal an khung thei lo. Counter attack aṭangin Arsenal an che fuh leh ta zawk. Martinelli chuan thui tak ball a tlanpui hnuah a hlauhawm laiah a cross a, defender Schar chuan hnai takah anmahni lamah a lo ti lut.

Arteta a lawm

Hun rei tak Premier League hmahruaitu an nihna chu tun hnaiah an hloh a, an elpui Man City chetsual changtu zawk ni tawh mah se Mikel Arteta chuan beisei an la neih bakah tun thlenga an khelh dan chu lawmawm a tih thu a sawi.

Arteta chuan, "Nikuma helai hmuna kan tawrhna kha kan la hrereng. Tunah chuan kan danglam ta, thil tum chiang tak kan nei a, chumi ti hlawhtling tur chuan ka naute an fingin an puitling tawh tih a takin kan hmu bawk.

"Mimal khel ṭha bik an awm a, team pumpui kan khel ṭha bawk. Fans nei ṭha leh boruak lian tak Newcastle United lakah khan kan ṭha tawk tih kan lantir thei kha ka lawm. Thla 10 chhung ṭha taka kan khelhna kha a hmawr bawk kan tum ang," a ti.

Arsenal hian Nottingham Forest (May 20), Brighton (May 14) leh Wolves (May 28) te an la hmachhawn dawn. An elpui Man City chuan Everton, Chelsea, Brighton leh Brentford te an la hmachhawn thung dawn.

Fimkhur ngai Magpies

Season hmang ṭha tak Newcastle United hi pathumnaah an la awm mek, khelh hmabak pali an la nei. Champions League khelh beisei mek Liverpool aia an sanna chu point thum chauh a ni tawh a, boruak a la inthlak danglam daih thei.

Magpies manager Eddie Howe chuan, "A chang chuan kan duh loh ang result kan pawm a ngaih chang a awm. Fan puihna kan dawng ṭha em em a, a tawpa lungawi lohna an lantir pawh kha thuk takin ka hrethiam.

"Chutihrualin, hei leh chen min puitute an ni a, a hmawr min bawk pui ngei ang tih ka chiang," a ti. An hmabakah tlak hlau Leeds United, Brighton, Leicester City leh Chelsea te an la awm, match awlsam a awm tawh lo ang.

UCL ticket inchuh boruakin a vawrtawp a thleng chho dawn. Newcastle United hi European football inelna sang bera inlan turin an ṭha tawk reng em tih chu kan hre thuai dawn, season an hman dan chhut kir chuan a sang pali zinga tel turin theihna an nei a ni.