De Gea a chesual, Man Utd an chak lo

Manchester United-in season thara Champions League khel turin point mamawh mah se Pathianni zan khan West Ham United an hmachhawn a, 1-0 in an hneh lo.

Goal awmchhun hi minute 27-naah Said Benrahma-a'n a khung a, goal tura ngaih ni lo mah se David de Gea-a'n a dan pial avanga lut a ni. Spanish manager hi contract thar chungchangah club nen an indawr mek a, tihsual pawi tham a neih fo tawh hnua a tihsual leh avangin Hammers laka a chetsual avang hian a hmalam hun thlengin a nghawng thei ang.

London Stadium-ah Man United-in bul an ṭan ṭha zawk a; Bruno Fernandes, Antony leh Marcus Rashford ten an chance neih chu goal pawnah chiah chiah vek an pet.

Hammers erawhin an hun ṭha neih Benrahma hmangin an khung a, De Gea tihsual ni mah se a goal miau avangin chak nan a tawk. United erawhin first half ang thoin second half-ah pawh an chance neih a khung thei lo.

David Moyes-a hoten point thum hlu tak an hlawhchhuah avangin point 37 an hmu a, table-ah 15-naah awm mah se relegation zone-a awm aiin point sarih an sang a, season thara Premier League khel turin an dinhmun a ṭha.

Man United erawh a zawna Brighton leh West Ham an hneh loh avangin an hmelma Liverpool nen an inthlauhna chu point khat chauh a ni tawh a, match khata an khelh thlem avangin season thara Champions League khel turin Jurgen Klopp-a hote aiin an dinhmun a la ṭha zawk.

Erik Ten Hag-a hoten hian an mualah Wolves, Chelsea leh Fulham an la hmachhawn dawn a, khualmualah Bournemouth an hmachhawn bawk ang.