MTB Moopin-ah Mesak-a pakhatna

India rama ni khat awh thirsakawr intlansiak (one-day cross country marathon) thui ber, Arunachal Pradesh a MTB Moopin 3.00 ah Mizo cyclist Mesak Vanlalvena chu 250km a thui intlansiakna Men's Elite category-ah pakhat a ni.

Sihfa tlangval Mesak-a hian darkar 14 leh minute 4 chhungin kawng thui hi a tlan chhuak a, Mizo cyclist dang Laldintluanga chu pathumna niin darkar 15 leh minute 19 chhungin a thleng ve thung a ni.

Mesak-a hian tun hmain Mizoram Cycling Association (MiCA) ina Mizoram chhunga thirsakawr intlansiak a buatsaih hrang hranga lawmman pakhatna a lo la fo tawh a, tunah chuan state pawn lamah pawh hlawhtlinna a chang chhunzawm.

Kum 17 hnuai lam inelna Junior categorya awm bawk, hei hi 112km a thui intlansiakna niin Mizo rawlthar Vanlalruata chu pahnihna a ni a, darkar 5 leh minute 46 chhungin a tlan thleng a ni.

MTB Moopin-ah hian Mizoram aṭangin MiCA Executive Committee member Michael Laldinsanga Ralte hovin cyclist pasarih an tel a, nikum lamah pawh Mizo cyclist te hian he intlansiakah hian hlawhtlinna changin lawmman an lo dawng tawh bawk.