Hnehna nena champion lawmtu Napoli

"Keini ngei mai hi Italy champion chu kan ni, keimahni ngei kan ni e..." tiin Napoli ṭantute chuan Serie A champion an nih chu an khelmual Diego Armando Maradona Stadium-ah ngei mai an lawm ta, an lawmna in van a tawng ngei ang.

Napoli hi kum 33 hnuah Serie A champion an ni leh a, nomawi la chawi chiah lo mah se Naples khawpuiah chuan Italian champion an nihna hi an lawm char char tawh. Nomawi hi season tawpa hlan tur an ni dawn.

Pathianni zan khan an champion tih a chian hnua an match hmasa an khel a, striker Victor Osimhen-a goal khat hmangin an mikhual Fiorentina chu 1-0 in an hneh. Osimhen hian second half tirah penalty hlah mah se, minute 74-naah inkhela goal awmchhun a khung.

Nigeria international Osimhen hian tun season Serie A match 35 a khelh aṭangin goal 28 a khungsak. Diego Maradona boruak leh a sulhnu te nen chuan khaikhin chi ni lo mah se, tun season an champion theih nan chuan tha a thawh hlawk hle.

Napoli coach Luciano Spalletti chuan, "Hlimna vawrtawp tawng duh tan chuan Naples khawpuiah hian a awm. Kan thil tih leh tha thawh chu a inzat vek kher lo ang, mahse hlimna erawh thuhmun vek kan nei thei thung.

"Naples khawpui hi thil mak tak tak a thlen tawhna hmun a ni a, kei ngei pawhin hetiang thil ka tawng ve ta mai hi a lawmawm," a ti. Spaletti hi kum 64 mi a ni tawh a, Italian football inelna sang berah hian team enkawl champion pui thei upa ber a ni.