Harden hoin 76ers an chak

James Harden-a point 42 hmangin Philadelphia 76ers chuan Boston Celtics chu nimin zing khan 116-115 in an hneh. NBA Eastern Conference semifinal-ah team pahnih hi 2-2 in an intluktawk mek.

May 10, Nilaini zing dar 5:00-ah game 5 an khel leh dawn, an inkhelhna tur hi Boston lam khelmual TD Garden a ni ang a, chumi hnuah Sixers khelmual lamah game 6 an la khel zui ve leh dawn a ni.

Nimin zing inkhelah team pahnih an inbeitawk hle. Hun tawp dawna Harden-a point neih hmangin Philadelphia 76ers hian Boston an nihrual a, overtime khelh niin Harden bawkin 3-points hmangin a team a chakpui.

Western Conference semifinal lamah Phoenix Suns chuan Denver Nuggets 129-124 in an hneh ve bawk a, team pahnih hi best of seven series-ah 2-2 in an inhnehtawk ve chiah bawk - Nilaini zing dar 7:30-ah game 5 an khel leh dawn a ni.

Suns tan hian Devin Booker leh Kevin Durant te chuan point 36 ve ve an nei a, bench aṭanga lut Landry Shamet chuan point 19 a nei - a point neih zinga 14 zet hi quarter hnuhnung bera a neih a nih avangin an chakna hnar tiin a sawi ngam.

Seeded pakhatna Denver tan Nikola Jokic-a'n point 53 tehmeuh a neiin point 28 neitu Jamal Murray langsar bawk mah se hnehna chan nan a tawk zo lo, regular season hmang ṭha tam team hian thawh chhuah leh ngei an tum ang.