Murray a champion ve leh ta!

Tennis chawlhsan mai tawh tura an ngaih Andy Murray khan beidawng loin a bei chhunzawm ngar ngar a, kum li deuh tawh a herliam leh meuh chuan ATP Challenger event-ah hlawhtlinna a chang leh ta.

Pathianni zana final khelhah Murray hian set a hloh hmasa, mahse world number 1 hlui a nihna lantirin seeded pakhatna Tommy Paul chu 2-6, 6-1, 6-2 a hnehin hlawhtlinna a chang.

Grand Slam vawi thum champion tawh Murray-a'n nomawi a chawi hnuhnung chu 2019 kha niin Antwerp Open-ah a champion, clay court bikah phei chuan Rome Open 2016 hnua a champion lehna hmasa ber a ni hial.

Kum 35 mi Murray chuan, "Hun rei tak chhung chu ka khelh dan phung pangngaiin ka khel thei lo a ni a, mahse khatiang harsatna ka tawh lai pawh khan ka team te chuan beidawng loin min awmpui reng.

"Ka tan chuan chawlh-kar nuam leh chhinchhiah tlak bik a ni a, min thlawp tura a hmuna lo kal leh in lam aṭanga lo entu zawng zawng chungah lawmthu ka sawi," tiin a sawi a, clay court inelna lian French Open atan beisei a nei sang zui dawn.