Pakuana aṭangin a hmasa berah Max Verstappen

Qualifying lamah duhthusam result nei lo mah se Max Verstappen hi chu dah hniam a remchang lo, intlansiak tak tak an hmachhawn leh meuh chuan a chungnung ber a ni leh thei tho.

Formula 1 Miami Grand Prix tlan zawh takah, pakuana aṭangin Verstappen hi a tlan ṭan. Red Bull driver hian a hma ami zawng zawng tlan pel vekin hnehna a chang a, a teammate Sergio Perez chu pahnihnaah a thleng thung.

Car intlansiakna sang ber hi tun season chhungin vawi nga an tlan tawh, heng inelna an hmachhawn tawh chinah hian Red Bull driver pahnih hian hnehna an la inchan sem vek, ṭum li ngawt chu pakhatna leh pahnihna dinhmun an luah hial.

Beisei phak baka season hmang ṭha - Aston Martin car khalhtu Fernando Alonso chu pathumnaah a thleng a, world champion vawi sarih ni tawh Lewis Hamilton chu parukna a ni thung. Mercedes driver Hamilton hi season hmasa aṭang khan a la chak ve leh miah lo.

Dutch tlangval Verstappen chuan, "Pakuana aṭanga bul ṭan chuan hnehna chan beisei san ngam a harsa, mahse car pakhat te te in ṭum khatah ka tlanpel ang a, a tawpah ka chak thei ang tih kha ka rilruah a awm reng.

"Chutiang chuan a mal malin ka tlanpel zel a, intlansiak dang aiin tun ṭum hi chu a hlutna pawh a sang viau niah ka ngai," tiin a sawi a, hnehna a chan chu mimal ṭhat vang bik ni loin team thawhrah a nih thu a sawi bawk.

Intlansiak vawi nga an neih tawhah Verstappen hi vawi thum a chak a, point 119 hmuin driver championship-ah hma a hruai mek. Amah hnaih bertu chu a teammate Perez a ni a, ani hian point 105 a hmu thung.