Madrid Open champion Alcaraz

Carlos Alcaraz chuan Madrid Open title a kawl lai a humhim. Pathianni zan final inkhel hmuhnawm takah Alcaraz hian Jan-Lennard Struff chu 6-4, 3-6, 6-3 a hnehin a champion.

Kum 20 tling hlim Alcaraz hian nomawi a chawi bakah ranking point a hmuh belh a, tun kara khelh tur Italian Open-ah match khat chauh pawh a khel hrim hrim a nih chuan Novak Djokovic nek chhuakin a chung berah a awm ang.

Clay court inelna Madrid Open-ah hian a zawna champion thei an awm ngai meuh lo, kum 2014 khan Spanish tlangval Rafael Nadal chuan a nomawi a lo humhim tawh - Nadal tih lohah chuan Alcaraz hi a zawna champion leh thei hmasa ber a ni hial.

Tun season kal laiah Buenos Aires leh Indian Wells-ah a champion tawh bawk a, Grand Slam dawta inelna ngaihhlut Masters 1000 huangah kumina vawi hnih champion thei hmasa ber a ni nghal bawk.

Spanish tlangval Alcaraz chuan, "Jan-a kha player ṭha tak a ni, a bik takin set hnihnaah khan a service chhuhsak theihna remchang nei mah ila ka thei tlat lo. Mahni duh anga thil a kal theih loh kha chuan rilru pawh a nghawng hman.

Mahse, set thumna kan khelh dawn kha chuan beiseina ka insiam thar leh a, a service na tak lo hmachhawn dan ka hre thar bawk a, a tawpah ka vannei ta a ni," tiin a sawi a, ruahman dan chuan Rome khawpuia khelh tur Italian Open-ah a inlan zui leh ang.

May 22 aṭangin French Open khelh a ni dawn, season hmasa US Open champion Alcaraz hi a hliam a nih ngawt loh chuan inelna lianah pawh enbik hlawh leh champion tura rinkai a ni phak dawn.